Կեղծ հաղորդագրություններով Ադրբեջանը պատերազմի հող է նախապատրաստում Հայաստանի դեմ՝ Արցախի օրինակով

Վերջին օրերին նկատելի ակտիվությամբ Ադրբեջանը մեղադրում է հայկական կողմին հրադադարի պահպանման ռեժիմը խախտելու համար։ Ըստ այդ երկրի ռազմական գերատեսչության՝ Հայաստանի զինված ուժերն իբր կրակ են բացել ադրբեջանական դիրքերի ուղղությամբ։ 

«Ադրբեջանը հող է նախապատրաստում, Արցախում տեղի ունեցածը մեզ լավ օրինակ։ Մի կողմից խոսում են երկարաժամկետ խաղաղության մասին, մյուս կողմից մեզ մեղադրում են հրադադարի ռեժիմը խախտելու մեջ։ Կեղծ լուրերը գեներացնում են հիմա, բայց մի օր դրա պատասխանը կտան, հիմնավորելով, որ պատասխան հարված ենք տվել»,- MediaHub-ին ասում է արցախյան պատերազմի մասնակից, արցախցիների հետ բլոկադան «կիսած» բուժեղբայր Գևորգ Սարգսյանը։ 

Իսկ ո՞րն է Արցախի օրինակը։ Մեր զրուցակիցը մանրամասնում է, թե՝ 2023 թվականի սեպտեմբերյան մարտերից առաջ ինչ քայլեր էր ձեռնարկում Ադրբեջանը։

«Արցախը գտնվում էր հումանիտար աղետի մեջ։ Բոլորը գիտեին, որ այդպես երկար չեն դիմանա, բայց չէին հանձնվում, պայքարում էին։ Իսկ դրա համար անհրաժեշտ էր նվազագույնը գյուղատնտեսությամբ զբաղվել, հող մշակել, վարուցանք անել։ Բայց քանի՜ անգամ են ադրբեջանական դիրքերից կրակել այգիներում աշխատող խաղաղ բնակիչների վրա։ Քանի՜-քանի՜ տեղային մարտերի ականատես եղանք։  Տպավորություն էր, որ, նախ, հաղորդագրությունն էին պատրաստում, հետո կրակ բացում տրակտորիստների, կոմբայնավարների, նռան բերքը հավաքող ամուսինների, դաշտերում աշխատող խաղաղ բնակիչների, առհասարակ՝ մեր դիրքերի ուղղությամբ։ Մի քանի վայրկյան հետո տարածվում է հաղորդագրությունը․ «սեպարատիստները կրակել են ադրբեջանական դիրքերի ուղղությամբ»»։

Ըստ մեր զրուցակցի՝ Ալիևի հայտարարած հակաահաբեկչական գործողության հիմքը հենց այդ կեղծ հաղորդագրություններն էին, որոնք կարճ ժամանակում վերաճեցին ռազմական գործողության։ 

«Իսկ դուք մտավախություն չունե՞ք, որ Ադրբեջանը ռազմական գործողությունների կգնա նաև Հայաստանի դեմ, փորձը արդեն կա։ Շուտով կլրանա երկօրյա պատերազմի 2 տարին, որ հարյուրավոր զոհեր ու տարածքային կորուստներ ունեցանք Ջերմուկում, Սյունիքի հարավում, Իշխանասարում։ Ու չհավատաք, որ թշնամին հետ է քաշվելու զբաղեցրած բարենպաստ դիրքերից»,- ընդգծեց Սարգսյանը։

Ադրբեջանը չի գնում Հայաստանի հետ խաղաղության։ Բուժեղբայր-ազատամարտիկն այսօր էլ ծանոթացել է ադրբեջանական լրահոսում տեղ գտած ամենաթարմ հաղորագրությանը, որի բովանդակությունն ավելի է մոտեցնում պատերազմը։ 

«Հաղորդագրությունում ասվում է, որ թշնամի երկրի պաշտպանության նախարար Զաքիր Հասանովը և ցամաքային զորքերի հրամանատար Հիքմեթ Միրզոևը ստուգել են ստորաբաժանումների մարտական պատրաստությունը Հայաստանի հետ պայմանական սահմանին։ Եթե դա պայմանական սահման է, ապա կարող էին որևէ երկրի անուն չգրել կամ հարևան որևէ պետության անուն նշել: Այս ամենը խիստ մտահոգիչ է»,- հավելեց Գևորգ Սարգսյանը։

Հունան Թադևոսյան