Լեռնային Ղարաբաղը հայտարարվել է «անկախ վարչա-քաղաքական տարածք»․ պատմության այս օրը (22 հուլիս)

ՈՐՈՇ ՏՈՆԵՐ- Սվազիլենդ՝ Հասարակության օր, Ադրբեջան՝ Ազգային մամուլի օր, Տաջիկստան՝ Տաջիկերենի օր, ՀԱՀ՝ Ծառատնկման օր։

ՀԱՅԱՍՏԱՆՈՒՄ

1915– Առաջին համաշխարհային պատերազմի Ալաշկերտի օպերացիայի ժամանակ Կովկասյան բանակի հրամանատարությունը պահեստային ուժերից կազմել է հատուկ հարվածային զորախումբ  գեներալ Բարաթովի հրամանատարությամբ, որը Դահար գյուղի մոտից հարձակվել է Աբդուլ Քերիմ փաշայի զորախմբի վրա։

1918– Շուշիում տեղի է ունենում Արցախահայության անդրանիկ համագումարը (ԱՀՀ), որը Լեռնային Ղարաբաղը հայտարարել է «անկախ վարչա-քաղաքական տարածք», ընտրվել է  Ազգային Խորհուրդ և հիմնվել ժողովրդական կառավարություն։

-Նախիջևանում սկսվել են բախումներ ադրբեջանցիների և գեներալ Շելկովնիկյանի հայկական կայազորի միջև, անգլիացի լեյտենանտ Շվինդին հաջողվել է միջնորդական առաքելություն իրականացնել և եռօրյա զինադադար հաստատել։

1928 – ծնվել է նկարիչ Վահան Խորենյանը։

1930 —ԽՍՀՄ-ի Կոլխոզկենտրոնը որոշել է, որ աշխատանքի վարձատրություն կոլխոզներում իրականացվելու է ոչ թե փողով, այլ աշխատօրերով։

1954 —ԽՄԿԿ Կենտրոնական Կոմիտեն ընդունել է «Բնակչության շրջանում առողջ ապրելակերպի քարոզչության ուժեղացման միջոցառումների մասին» որոշումը։

1956- շահագործման է հանձնվել Երևանի կայարանի նոր շենքը։

2003- մահափորձ է կատարվել Երևանի Էրեբունի համայնքի ղեկավար Մհեր Սեդրակյանի նկատմամբ: Վնասվածքներ ստացած Սեդրակյանը տեղափոխվել է հիվանդանոց:

2011- առաջին անգամ հայ սուզորդների թիմն ուսումնասիրել է Արագած լեռան Քարի լճի հատակը:

2012 –վախճանվել է անվանի դերասանուհի Գալյա Նովենցը։

2013-Երևանյան հասարակական տրանսպորտի ուղեվարձը 50 դրամով բարձրացնելու քաղաքապետի որոշման դեմ բողոքի ակցիաներ են սկսվել։

2015-Նոր Հաճնում բացվել է Սուրբ Ամենափրկիչ եկեղեցին, որը Գագիկ Ծառուկյանի հովանավորությամբ կառուցված յոթերորդ եկեղեցին էր։

2016-Վիտալի Բալասանյանի միջնորդությամբ անցկացվող բանակցությունների արդյունքում հաջողվել է համաձայնության գալ և ահաբեկչություն իրականացրած և ՊՊՁ գունդը գրաված «Սասնա ծռերի» անդամներին սնունդ է փոխանցվել:

ԱՇԽԱՐՀՈՒՄ

1099– խաչակիրների կողմից ստեղծված Երուսաղեմի թագավորության ղեկավար է դարձել Գոդֆրուա Բուլյոնցին։

1246 —65-ամյա իտալացի ճանապարհորդ Ջովաննի դա Պլանո Կարպինին եվրոպացիներից առաջինն է եղել, որը հասել է մոնղոլների կայսրության մայրաքաղաք Կարակորում։

1298 —տեղի է ունեցել Ֆոլկերեյի ճակատամարտը, որը Շոտլանդիայի անկախության համար մղվող առաջին պատերազմի ժամանակ շոտլանդացի ապստամբների և անգլիացիների միջև տեղի ունեցած ամենախոշոր ճակատամարտն է։

1456 —հունգարական բանակն ազատագրել է Բելգրադն օսմանական նվաճողներից։

1498 —վախճանվել է իտալացի նկարիչ Ֆրանչեսկո Բոտտիչելին։

1502 - պորտուգալական արշավախմբի կազմում  ճանապարհորդած Ամերիգո Վեսպուչին վերադարձել է Լիսաբոն։

1713 –ծնվել է ֆրանսիացի ճարտարապետ Ժակ Ժերմեն Սուֆլոն։

1814 —Օհայոյի հինգ հնդկական ցեղեր խաղաղություն են կնքել ԱՄՆ-ի հետ և պատերազմ հայտարարել Անգլիային։

1878– ծնվել է լեհ բժիշկ, մանկավարժ, գրող, լրագրող, հասարակական գործիչ Յանուշ Կորչակը, որն առաջինն է քայլեր ձեռնարկել երեխաների իրավունքների պահպանության և լրիվ հավասարության ոլորտում։

1894 —ֆրանսիայում կայացել է  «Paris-Rouen Trail» առաջին ավտոմոբիլային մրցույթը։.

1910- Ռուսաստանի  Յասնայա Պոլյանայում հրդեհից ոչնչացել են Լև Տոլստոյի ձեռագրերը։

1927– հիմնադրվել է «Ռոմա» իտալական ֆուտբոլային ակումբը։

1944– ստեղծվել է Արժույթի միջազգային հիմնադրամը։

1960-Կուբան ազգայնացրել է ԱՄՆ-ին պատկանող շաքարի գործարանները, շաքարը սկսել են արտահանել ԽՍՀՄ։

1965– ծնվել է ամերիկացի պրոֆեսիոնալ ըմբշամարտիկ և հեռուստահաղորդավար Շոն Մայքլզը, որը ռեկորդային 10 անգամ հաղթել է «Pro Wrestlin Illustrated» հանդեսի «Տարվա մարտ» անվանակարգում։

1986 —Բրիտանիայի խորհրդարանի համայնքների պալատը քվերակել է պետական դպրոցներում մարմնական պատիժներն արգելելու որոշման օգտին։

1992 –ծնվել է  ամերիկացի դերասանուհի և երգչուհի Սելենա Գոմեսը։

2010 —Արգենտինայում ուժի մեջ է մտել միասեռ ամուսնությունների թույլատրման մասին օրենքը։

2011– Նորվեգիայի մայրաքաղաք Օսլոյում տեղի  ունեցած ահաբեկչական պայթյունի հետևանքով զոհվել է 77 մարդ, 151-ը ստացել են վնասվածքներ։

Կ. Խաչիկյան