«Gallup International–ի սոցհարցումը ոչ հաճելիորեն զարմացրել է. «Հայերը չեն ցանկանում ապրել ադրբեջանցիների հետ»»
ՔԱՂԱՔԱԿԱՆՈՒԹՅՈՒՆ
Gallup International Association-ի Հայաստանում անցկացրած հարցման մասնակիցների 75,7 %-ը հայտարարել է, որ իրենք վստահաբար պատրաստ չեն գոյակցել ադրբեջանցիների հետ, նույնիսկ եթե միջազգային կառույցները երաշխավորեն խաղաղությունն ու անվտանգությունը։ Այդ մասին հայտնել է այդ ընկերության հայաստանյան ներկայացուցչության ղեկավար Արամ Նավասարդյանը, գրում է tsargrad.tv-ն։ Հեռախոսային հարցմանը, որն անցկացվել է ապրիլի 22-ից 25-ը, մասնակցել է 1100 հարցվող։ Ընդ որում, հարցվածների 9,6 %-ն, ամենայն հավանականությամբ, պատրաստ է ադրբեջանցիների հետ գոյակցել, 6,2 %-ը` միանշանակորեն է պատրաստ, 6,1%-ը` ավելի շուտ պատրաստ չէ, իսկ 2,4 %-ը դժվարացել է պատասխանել այդ հարցին։
Իհարկե, այդ ուսումնասիրության տվյալներին պետք է զգուշությամբ վերաբերվել, քանի որ կան հարցեր և՛ դրա մեթոդաբանության՝ հարցումների հեռախոսային լինելու, և՛ ընտրանքի ներկայացուցչականության վերաբերյալ՝ միայն ըստ տարիքի, առանց հաշվի առնելու սեռը և կրթությունը: Բայց սոցիոլոգիական հետազոտությունները կարող են խոսել բնակչության որոշակի հատվածի տրամադրվածության մասին։
«Արդյունքում հարցվածների 75,7 %-ը (ի՜նչ զարմանք) պատրաստ չէ ադրբեջանցիների հետ խաղաղ գոյակցության։ Դա շատ սուր խնդիր է, որին բախվում է հասարակությունը, և որն այժմ իշխանությունները փորձում են հարթել պատմությունը վերաշարադրելու միջոցով,- գրել է Rybar հեռագրային ալիքը,– այսինքն հավաքական Արևմուտքը ցանկանում է «վերափոխել» Հայաստանի ժողովրդին, բայց դա առայժմ չի ստացվում»:
Նույն հարցման մեկ այլ արդյունք է այն, որ հարցվածների 84,2 %-ը կողմ է արտահայտվել Սահմանադրության մեջ ցեղասպանության հիշողության ամրապնդմանը։ Եվ վերջապես, ցեղասպանության վերաբերյալ տվյալների ճշգրտությունը ստուգելու իշխող կուսակցության փորձերը` հարցվածների 53,9 %-ը համարել է պատմությունը վերաշարադրելու թուրքական ծրագիր։
«Հետաքրքիր պատկեր է ստացվում, հայ բնակչությունը շատ սուր է արձագանքում որոշակի այնպիսի թեմաների, որոնք կապված են առաջին հերթին ազգային ինքնության և ինքնաըմբռնման հետ։ Եվ հենց այդ հարցերն են, որոնց վրա հիմա ճնշում է գործադրում և՛ Նիկոլ Փաշինյանի վարչակազմը, և՛ հավաքական Արևմուտքը, հայերին ստիպելով հրաժարվել իրեցն ինքնությունից, և «վերակազմավորվել»», - եզրափակել է Rybar-ը։
Նյութը հրապարակման պատրաստեց Կամո Խաչիկյանը
