ՄԱԿ-ի գլխավոր քարտուղարի օգնականը քառօրյա այցով Հայաստանում է․ որո՞նք են հիմնական նպատակները

ՄԱԿ-ի գլխավոր քարտուղարի օգնական, ՄԱԿ-ի Զարգացման ծրագրի ադմինիստրատորի տեղակալ, Եվրոպայի և ԱՊՀ երկրների տարածաշրջանային բյուրոյի տնօրեն` Իվանա Ժիվկովիչը մայիսի 5-ին քառօրյա այցով ժամանել է Հայաստան։ Այս մասին տեղեկանում ենք ՄԱԿ-ի հայաստանյան գրասենյակից։

Տիկին Ժիվկովիչի այցի նպատակն է քննարկել ՄԱԿ-ի Զարգացման ծրագրի (ՄԱԶԾ) Հայաստանի կառավարության հետ գործընկերությունը, տեղում ծանոթանալ ՄԱԶԾ-ի հիմնական միջամտություններին, ներառյալ փախստականների ճգնաժամին արձագանքելը, ինչպես նաև դիտարկել ՄԱԶԾ-ի զարգացման օրակարգը և հիմնական առաջնահերթությունները միջազգային և ազգային գործընկերների հետ:

ՄԱԶԾ հասարակայնության հետ կապերի համակարգող Հովհաննես Սառաջյանը 1or.am-ին ասաց, որ այցը նախապես էր պլանավորված, թեև դրա մասին տեղեկություն լրատվականին չհաջողվեց գտնել։ Թեև նպատակներից մեկը փախստականների խնդիրներն էին, սակայն նրանց հետ հանդիպում նախատեսված չէ։ Սառաջյանի խոսքով՝ իրենց շահառուների հետ է հանդիպում լինելու։

«Հայաստանում ՄԱԶԾ մշտական ներկայացուցիչ Նաթիա Նացվլիշվիլիի ընկերակցությամբ, նա կհանդիպի Ազգային ժողովի նախագահի հետ՝ մեկնարկելու Հայաստանում խորհրդարանական ժողովրդավարության վերաբերյալ նոր ծրագիրը, ինչպես նաև կհանդիպի ՀՀ փոխվարչապետի և ՀՀ արտաքին գործերի նախարարի տեղակալի հետ։ Նա նաև քննարկումներ կունենա ՄԱԿ-ի երկրի թիմի, դիվանագիտական կորպուսի, զարգացման գործընկերների, ինչպես նաև քաղաքացիական հասարակության ներկայացուցիչների հետ»,- հայտնում են ՄԱԶԾ-ից:

Հայաստանում ժողովրդավարության թեմայի շուրջ քննարկումներ են ընթանում, ինչը, միանշանակ, ողջունելի է, հատկապես այն բանից հետո, երբ հեղինակավոր իրավապաշտպան կառույցներն են դրա վերաբերյալ իրենց զեկույցներում մտահոգություն հայտնում։ Միայն տարօրինակն այն է, որ Սառաջյանը 1or.am-ին ասաց, թե ընդդիմադիր գործիչների հետ հանդիպումներ չեն նախատեսվում։

1or.am-ը Սառաջյանից խնդրեց տրամադրել նաև քաղհասարակության ներկայացուցիչների ցանկը, որոնց հետ էլ Ժիվկովիչը պատրաստվում է հանդիպել, խոստացավ տրամադրել, սակայն ապարդյուն։

Տիկին Ժիվկովիչը նախատեսում է այցելել Արարատի, Վայոց Ձորի և Սյունիքի մարզեր։ Նա երեկ արդեն եղել է Տավուշում և Գեղարքունիքում։ Ժիվկովիչին ուղեկցել են Հայաստանում ՄԱԶԾ մշտական ներկայացուցիչ Նաթիա Նացվլիշվիլիին և ՀՀ շրջակա միջավայրի նախարարի տեղակալ Արամ Մեյմարյանը։