Փաշինյանը կրկին հոգեցնցումների մեջ է. կասկածի տակ է իր մեջքը պահողների հավատարմությունը

Փաշինյանը լուրջ կասկածներ ունի, թե իր անվտանգության աշխատակիցները ամենօրյա գրաֆիկով կարևոր ինֆորմացիա են դուրս հանում, համագործակցում են ընդդիմության հետ, հայտնում իր և տիկնոջ տեղաշարժի մասին տեղեկություններ, թե անձնական բնույթի, և թե արարողակարգային: Վերջին դեպքը, որը կրկին նրան հասցրել է հիստերիայի, ապրիլի 24-ին տեղի ունեցած հայտնի դրվագն է:

Փաշինյանը վստահ է, որ Աննա Հակոբյանին ու կրտսեր դստերը Ծիծեռնակաբերդի հուշահամալիր ուղեկցելիս անվտանգությունը տեղյակ է եղել, որ տեղում` «Նիկոլ ցեղասպան» և «Նիկոլ թուրք» վանկարկումներով և պաստառներով նրանց են դիմավորելու «Ազգային ժողովրդական Բևեռ» կուսակցության ներկայացուցիչները: Ամուսնու մասին բացականչություններին ի պատասխան տիկին Հակոբյանը միայն ծամածռում էր դեմքը, ժպտում և տարօրինակ հայացքներ նետում այս ու այն կողմ:

Համացանցում օրեր շարունակ պտտվում է այս միջադեպի տեսանյութը, որի մեկնաբանություններն էլ իրենց բացասական բնույթով, վիրավորանքներով չեն զիջում մեկը մյուսին: Նիկոլ Փաշինյանը, տեսնելով այս ամենը, մեղադրել է անվտանգության աշխատակիցներին դավադրության մեջ, սպառնացել, կասկածներ հայտնել, որ պետական արարողակարգի համակարգում կան աղբյուրներ, որոնք ընդդիմությանը հայտնում են իր այցերի և հանդիպումների ժամերի, դրանց ընթացքում քննարկված փակ ինֆորմացիաների մասին:

Ի դեպ, կասկածները վերաբերում են բոլոր ուժային կառույցներին, ԱԱԾ-ի, ՊՆ-ի վրա զայրացած է Տավուշի մարզում զինծառայողների` ցուցարարներին միանալու համար, ոստիկանության վրա՝ անգրագետ գործելաոճի համար: Ի դեպ, զինծառայողների` ակտիվիստների կողմն անցնելու հաջորդ առավոտյան, ոչ աշխատանքային օրով ստիպողաբար Երևանի, ինչպես նաև հարակից մարզերի կայազորներում տեղակայված զորամասերի բոլոր պայմանագրային զինծառայողներին ու քաղաքացիական աշխատողներին հավաքել են տեղերում, հրահանգավորելու` Բագրևանդի 5-ից նախապես իջեցված բանավոր ցուցման համաձայն, քաղաքական գործընթացներից զերծ մնալու վերաբերյալ, անդրադարձ կատարելով նաև լրատվամիջոցներին, թե վերջիններս հենվում են ադրբեջանական կայքերի կեղծ լուրերի վրա, շահարկում են ապատեղեկատվությունը՝ թյուրիմացության մեջ գցելով պետական ծառայողներին, և հորդորել են չկարդալ կայքերն ու հնազանդ կատարել իշխանության հրամանները:

Այժմ կայքերում ցուցադրական տարածում են 20 զինծառայողների` իրենց արարքի համար զղջալու վերաբերյալ տեսանյութերը: Այս մեթոդներով Փաշինյանը փորձում է վերահսկողությունը վերականգնել, սակայն թե պետական կառույցներում, թե ժողովրդի շրջանում իշխանության հանդեպ վստահությունը, մեղմ ասած, թուլացել է, բոլորն են հասկանում, որ հայրենիքը կորցնելու վտանգը հասել է գագաթնակետին և Փաշինյանի քմահաճություններն ու գործելաոճը շարունակում են հող ու արյուն արժենալ: