Դո՞ւ ես որոշում՝ գնամ եկեղեցի, թե ոչ․ Ոսկեպարում վեճ է բռնկվել քաղաքացու և փոխոտսիկանապետի միջև

Ոսկեպարում մերթընդմերթ իրավիճակը լարվում է։ Ականազերծման աշխատանքները շարունակվում են, Պաշտպանության նախարարությունը սակրավորների նոր խումբ ուղարկեց Ոսկեպարի Սուրբ Աստվածածին եկեղեցու տարածք։

Բնակիչները կրկին փորձեցին մոտենալ եկեղեցուն, սակայն ոստիկանական ուժերը կրկին նրանց թույլ չտվեցին։

«Այս պահին մի գնացեք, դուք գնալու եք, բախում է լինելու։ Ռազմական ոստիկանությունը ծառայություն է անում, հիմա կվերջացնի կգնաք 2 ժամից։ Համբերե՛ք, երբ ճանապարհը բացվի կգնաք»,- ասաց փոխոստիկանապետ Կարեն Հակոբյանը։

Բնակիչների հակադարձումներին, թե եկեղեցին հանձնում են, Հակոբյանն ասաց․ «Հստակ գիտեմ, եկեղեցին չի տրվելու»։

Բնակիչների հակադարձմանը, թե տեսե՞լ է Մհեր Գրիգորյանի գրասենյակի տարածած քարտեզները, նա բացասական պատասխան տվեց․ «Ո՛չ, չեմ տեսել»։

Ոսկեպարի Սուրբ Աստվածածին եկեղեցի փորձեց հոգևորական գնալ, ինչին ի պատասխան փոխոստիկանապետն ասաց․ «Մեկ ժամ հետո եկեք»։

Բնակիչներից մեկն էլ, երբ փորձում էր գնալ եկեղեցի, ասաց․ «Դո՞ւ ես որոշում գնամ եկեղեցի, թե ոչ, ինձ ոչ ոք չի կարող ասել ինչ անեմ»։

«Այդ ի՞նչ ձև ես խոսում։ Ոչ ոք չփորձի այստեղ շանտաժ անել, ուրիշ ձև կլինի ամեն բան»,- հակադարձեց Կարեն Հակոբյանը։

Հիշեցնենք, որ Ոսկեպարում արդեն 1,5 ժամ է, ինչ ականազերծման աշխատանքներ են տեղի ունենում եկեղեցու տարածքում, բնակիչները փորձում են թույլ չտալ, խանգարել, սակայն մեծ թվով ոստիկանական ուժեր են հսկում նրանց, որպեսզի չմոտենանան եկեղեցուն։

Ավելի վաղ փոխվարչապետ Մհեր Գրիգորյանի գրասենյակը հայտարարություն էր տարածել, որտեղ ասվում էր, թե պայմանավորվածություն է ձեռք բերվել Ադրբեջանի հետ սահմանազատման և սահմանագծման աշխատանքների հետ կապված։ Հրապարակվել է քարտեզ, որով եկեղեցին անցնելու է Ադրբեջանի տիրապետության տակ։