Պաշտոնական Երևանից հնչում են Թուրքիայի և Ադրբեջանի օրակարգի հայտարարություններ. Մելքոնյանը՝ Փաշինյանի հայտարարության մասին (տեսանյութ)
ՔԱՂԱՔԱԿԱՆՈՒԹՅՈՒՆ
Մոսկվայում տեղի ունեցած ահաբեկչությունից հետո ՀԱՊԿ հայտարարության չմասնակցելը ՀՀ-ի ՀԱՊԿ-ում սառեցված գործունեության դրսևորումներից է: Գործունեությունը սառեցված է, բայց դե յուրե ՀՀ-ն ՀԱՊԿ-ի անդամ է: Սա իշխանությունների համար կարևոր է «ծախել» Արևմուտքի վրա և ցույց տալ, որ ՀԱՊԿ-ի հետ կապ չունենք:
Այս մասին Tert.am-ի հետ զրույցում հայտնեց պ.գ.թ. , «Ապրի» վերլուծական կենտրոնի գիտաշխատող, «Հայկական նախագծի» համահիմնադիր, միջազգայնագետ Սերգեյ Մելքոնյանը:
«Վերջին 4 տարիների ընթացքում մենք տեսնում ենք վեկտորի փոփոխության հետևանքները: Հայաստանը կորցրեց Արցախը, տեղի են ունենում էսկալացիաներ, ինչի հետևանքով մենք կորուստներ ենք ունենում: Առաջիկայում կորուստներ կարող են լինել Տավուշի մարզի ուղղությամբ, հետագայում Գեղարքունիք, Վայոց Ձոր, Արարատ, Սյունիք: Բոլոր ուղղություններով Հայաստանը կունենա կորուստներ, եթե այս քաղաքականությունը շարունակվի»,- նշեց նա:
Անդրադառնալով այն դիտարկմանը, որ ՀՀ-ն հումանիտար օգնություն էր ուղարկել Թուրքիային երկրաշարժից հետո, սակայն Կրոկուսում տեղի ունեցած ահաբեկչությունն այդպիսի բարձր գնահատականների չարժանացավ իշխանությունների կողմից, Մելքոնյանը նշեց.
«Սա հենց այն ինդիկատորն է, որ ապացուցում է, որ ՀՀ արտաքին քաղաքականությունը չի սահմանափակվում ռուսամետությամբ կամ արևմտամետությամբ, այլ հիմնական վեկտորներից մեկը Թուրքիան է: Նիկոլ Փաշինյանն ունի ուղիղ կապ Էրդողանի հետ և դա հայտարարվել է: Նույնիսկ 1 բացասական հայտարարություն ուղղված Թուրքիային ՀՀ իշխանություններից չի հնչել վերջին տարիներին»:
Խոսելով Սամվել Շահրամանյանի հարցազրույցի և Նիկոլ Փաշինյանի Կառավարության նիստին հնչեցրածի մասին՝ միջազգայնագետն ընդգծեց.
«Կա պրագմատիկ պատասխան, ինչը կփորձեն փաթեթավորել այն տրամաբանության մեջ, որ եթե այլ կերպ արձագանքեին Ադրբեջանը կունենա հարձակվելու պատրվակ, սակայն հարձակման մի շարք պատրվակներ արդեն ստեղծել է ՀՀ իշխանությունը՝ ճանաչելով Տավուշի մարզի որոշ տարածքներ ադրբեջանական: Այս հայտարարությունները հնչում են հիմնվելով Թուրքիայի և Ադրբեջանի շահերի վրա: Թուրքիան ու Ադրբեջանը հայտարարում են «Ի՞նչ Արցախ, ի՞նչ Լեռնային Ղարաբաղի Հանրապետություն, ի՞նչ վտարանդի կառավարություն» և մենք տեսնում ենք, որ պաշտոնական Երևանից նույն հայտարարությունները հնչում են:
Սա ոչ հակառուսական քաղաքականություն է, ոչ պրոարևմտյան քաղաքականություն է, սա թուրքական քաղաքականության կոմպոնենտներից մեկն է: Յուրաքանչյուր հայ գիտի, որ կա Հայաստանի Հանրապետություն, կա Արցախի Հանրապետություն և Հայկական Սփյուռք»:
