«Ամեն ինչ տանք, որ պատերազմ չսկսվի»․ հանրությունը գիտի, որ այդ սկզբունքը չի աշխատել. Տիգրան Աբրահամյան
ՀԱՍԱՐԱԿՈՒԹՅՈՒՆ
Վերջին օրերին ակտիվ քննարկումների դաշտ մտած թեման՝ 4 գյուղի հանձնման վերաբերյալ և անվտանգային և երկրի կենսունակության տեսանկյունից վերաբերում են ողջ հանրապետությանն ու նրա ապագային: Այս մասին, այսօր՝ մարտի 19-ին, ԱԺ հայտարարությունների ժամին ասաց «Պատիվ ունեմ» խմբակցության քարտուղար Տիգրան Աբրահամյանը:
«Եկեք մի պահ մի կողմ թողնենք «դավաճան», «հանձնող», «տապալող» բառերը, որոնք բնութագրիչներ են դարձել վերջին տարիներին, որպեսզի շեղումը դրա վրա չլինի և հարցի բովանդակային կողմին անդրադառնանք: Նիկոլ Փաշինյանը հայտարարեց, որ սահմանազատման և սահմանազատման գործընթացը մտնում է գործնական փուլ և այն կարող է սկսել է Բաղանիս-Բերքաբեր ընկած հատվածից:
Իսկ ի՞նչ փաստաթղթերի ու քարտեզների հիման վրա է կատարվելու այդ գործընթացը, քանի որ մինչև հիմա էլ ՀՀ տարբեր պաշտոնյաներ նշում են, որ բանակցությունների հիմնական հակասություններից մեկը, որն արտացոլված է Ադրբեջանի իշխանությունների պաշտոնական հայտարարություններում, վերաբերում է սահմանների ճշգրտման տակ դրվող քարտեզներին և իրավական բազային»,- նշեց Աբրահամյանը:
Նրա խոսքով, եթե այս հարցում չկա դիրքորոշումների համաձայնություն, ապա ինչի՞վրա է իրականացվում այս պահին 4, իսկ հետագայում 4 անկլավների հանձման գործընթացը:
«Երկրորդ, Հայաստանի իշխանությունը վերջին փուլում Ադրբեջանի պահանջած 4+4 գյուղերի թեմայի համատեքստում խոսում էր Ադրբեջանի կողմից հայկական տարածքների օկուպացիայի մասին, սակայն հիմա երբ խոսվում է գործնական քայլերի մասին, չգիտես թե ինչ տրամաբանությամբ հանձման-ճշգրտման գործընթացը տեղի է ունենում միակողմանի:
Փաշինյանը նաև ասում է, թե իր քաղաքականությունն այն է, որ պետք է պատերազմ թույլ չտանք՝ ակնարկելով այն հանգամանքը, որ Ադրբեջանն իր հետ սպառնալիքի լեզվով է խոսում, ինքն էլ ստիպված հասարակությանն է շանտաժի ենթարկում: Եթե հիմքը այն է, որ ամեն ինչ տանք, որ պատերազմ չսկսի, ապա հանրությունը լավ գիտի, որ այս սկզբունքը չի աշխատել և նույնիսկ միակողմանի զիջումներից հետո Ադրբեջանը գնացել է նոր ագրեսիայի:
Երբ դու քո հրապարակային խոսքի հիմքում այս սկզբունքն ես դնում ՝ դրանով քո թուլությունն ես ի ցույց դնում թշնամուդ՝ նրան նոր խաղաքարտ տալով: Իշխանությունը երկրի ներսում, այդ թվում նաև այս դահլիճում խոսում է հոխորտանքների ու վիրավորանքների, սպառնալիքների լեզվով, իսկ երբ խոսքը գնում է Ադրբեջանի սպառնալիքներին պատասխանելուն, ապա խոնարհ, ստորացված, կուչ եկած կեցվածքում է»,- ընդգծեց Աբրահամյանը:
Նա նաեւ հավելեց. «Այստեղ, և այս դահլիճից դուրս գտնվող գործիչների, ուժերի, առաջնորդների քաղաքական հետագիծը բոլորի աչքի առաջ է եղել և պատմությունը շատ հստակ արձանագրելու է՝ ով է հաղթել, ով է հայրենիք ազատագրել և ով է զիջել ու հանձնել մեր հայրենիքը:
