ՔՊ-ն երաշխավորագիր է տվել, բայց Փաշինյանը մտադիր չէ ազատել Ալենի եղբոր կնոջը

ԱԺ «Քաղաքացիական պայմանագիր» խմբակցությունը գրեթե ողջ կազմով միացել է «Սիներջի» ընկերության կալանավորված աշխատակիցների խափանման միջոցը փոխելու վերաբերալ երաշավորագրին։ Բացառությամբ երկու պատգամավորների, որոնք գտնվում են գործուղման մեջ, խմբակցության մյուս 69 պատգամավորներն իրենց ստորագրությունն են դրել Աշոտ Հովհաննիսյանին, Լիլի Մկրյանին և Ալեն Սիմոնյանի եղբոր կնոջը՝ Անի Գևորգյանին ազատ արձակելու երաշխավորագրի տակ, ընդ որում ՔՊ-ի այս քայլն արժանացել էր անգամ ընդդիմադիր պատգամավորների գովասանքի խոսքերին։

Հիշեցնենք՝ Էկոնոմիկայի նախարարությունում կոռուպցիոն սկանդալի բռնկումից հետո ձերբակալվել էին 7 անձինք, Նախարարության 4 բարձրաստիճան աշխատակիցների, որոնք, ըստ մեղադրանքի հիմնական մեղավորներն են, տնային կալանքի են ենթարկել, մինչդեռ «Սիներջի» ընկերության տնօրենին, գործող աշխատակցին և նախկին աշխատակից Անի Գևորգյանին կալանավորել էին։

Երիտասարդ և մանկահասակ երեխաներ ունեցող կանանց նկատմամբ իրավապահների այս վերաբերմունքը նույնիսկ գործող իշխանությանն էր տարակուսանքի մեջ գցել։ Մեր աղբյուրների փոխանցմամբ՝ թեև Նիկոլ Փաշինյանը ոչինչ չի ասել երաշխավորագրի վեերաբերյալ, սակայն հանձնարարել է Քյարամյանին որևէ կերպ ազատ չարձակել «Սիներջի» ընկերության աշխատակիցներին։ Առավելապես թիրախի տակ հենց Ալեն Սիմոնյանի եղբոր կինն է։ Նրա կալանավորմամբ Փաշինյանը Սիմոնյանին և սեփական կուսակիցներին հասկացնում է, թե ով է իրականում իրավիճակի տերը և ինչ կլինի նրանց հետ, եթե հանկարծ փորձեն իր դեմ խաղեր տալ։

Մեր աղբյուրների փոխանցմամբ՝ Փաշինյանն Ալեն Սիմոնյանին կասկածում է ներքաղաքական պալատական հեղաշրջում ծրագրելու մեջ և հենց այդ կապակցությամբ էլ նախազգուշական նպատակներով կալանավորել է նրա եղբոր կնոջը, ինչն, իհարկե, հարուցել է սեփական կուսակիցների զարմանքը և վրդովմունքը։

Այլևս յուրաքանչյուր ՔՊ-ական հասկանում է, որ ո՛չ իրենք, ո՛չ իրենց ընտանիքի անդամներն անվտանգության մեջ չեն։

Աննա Սարիբեկյան