«Ադրբեջանի նախագահն ու Հայաստանի վարչապետը համոզված են, որ Հայաստանի Սահմանադրությունն արմատական փոփոխությունների կարիք ունի»
ՎԵՐԼՈՒԾՈՒԹՅՈՒՆՆԵՐ
Vestikavkaza.ru–ն գրում է, որ Իլհամ Ալիևը հայտարարել է, որ փոփոխություններ պետք է կատարվեն ոչ միայն Հայաստանի հիմնական օրենքում, այլ նաև այլ կարգավորող փաստաթղթերում։ Նա հիշեցրել է, որ Հայաստանի անկախության հռչակագիրը ներառում է Ադրբեջանի Ղարաբաղի շրջանը Հայաստանին միավորելու և Ադրբեջանի տարածքային ամբողջականության խախտման ուղղակի կոչեր։ «Այդ թեմայի շուրջ քննարկումների մեկնարկը Հայաստանում գնահատվում է որպես դրական քայլ, որը կարող է լավ հնարավորություն ստեղծել խաղաղության գործընթացի արագ ավարտի համար», - ասել է Իլհամ Ալիևը։ Նիկոլ Փաշինյանն էլ է հայտարարություն արել սահմանադրական հանրաքվեի մասին: Ըստ վարչապետի, դա պետք է Հայաստանին:
Ինչպես նշել է vestikavkaza.ru -ի ավագ վերլուծաբան Անդրեյ Պետրովը, Ալիևի ու Փաշինյանի հայտարարությունների համաժամանակությունը վկայում է Բաքվի և Երևանի դիրքորոշումների համընկման մասին, որն է Ադրբեջանի տարածքի նկատմամբ պահանջները Հայաստանի Սահմանադրությունից ջնջելու անհրաժեշտությունը։ «Մենք տեսնում ենք, որ Ադրբեջանն ուղղակիորեն է բարձրացնում Հայաստանի Սահմանադրությունից Անկախության հռչակագրին հղումը վերացնելու հարցը։ Պահանջը տրամաբանական է, քանի որ առանց դրա պետությունների միջև խաղաղության պայմանագրի ստորագրումն անհարկի իրավական հակասություններ կստեղծի,– ասել է նա,– միևնույն ժամանակ, մենք տեսնում ենք, որ Նիկոլ Փաշինյանի ռեժիմը համաձայնում է այդ քայլին, որը դրական զարգացում է հայ-ադրբեջանական կարգավորման հարցում: Բացի դա Փաշինյանը կօգտվի առիթից վերաշարադրելու Սահմանադրությունն իր համար, նա ընդամենը 48 տարեկան է և ակնհայտորեն չի ծրագրում հրաժարվել իշխանությունից։ Սահմանադրության բարեփոխումը կարելի է այնպես անել, որ հաջորդ 30 տարին Նիկոլ Փաշինյանը հանգիստ կառավարի երկիրը, օրինակ որպես նախագահ: Բացի դա Երևանը ճանապարհ է փնտրում Թուրքիայի հետ սահմանները բացելու համար, իսկ դա անհնար է առանց Ադրբեջանի հետ խաղաղության պայմանագիրի»։
«Կարելի է կանխատեսել, որ Հայաստանի բնակչության մեծամասնությունը կողմ կքվեարկի նոր Սահմանադրությանը: Ադրբեջանի հողերի նկատմամբ պահանջներից հրաժարվելը կնվազեցնի Հայաստանում ռևանշիստական քաղաքականության վերսկսման հնարավորությունները, մարդիկ հիմա ուզում են, որ պատերազմը չվերադառնա տարածաշրջան, և բոլորը կարողանան ապրել խաղաղության և հանգստության մեջ: Իհարկե, ազգայնականները կփորձեն դիմակայել դրան, բայց Նիկոլ Փաշինյանը կօգտագործի նրանց գործունեությունը հենց իրենց դեմ հայկական ազգայնականությունը ներկայացնելով որպես Հայաստանի առաջ գնալուն խանգարող հիմնական խոչընդոտ»,- եզրափակել է Vestnik Kavkaza-ի ավագ վերլուծաբանը։
Նյութը հրապարակման պատրաստեց Կամո Խաչիկյանը
