Ինչո՞ւ եք այդքան վախեցած. Փաշինյանին ուղղված Լեւոն Քոչարյանի հարցին ՔՊ–ն աղմուկով արձագանքեց
ՔԱՂԱՔԱԿԱՆՈՒԹՅՈՒՆԱզգային ժողովի նիստում այսօր՝ հունվարի 17–ին, կառավարության հետ հարցուպատասխանի ժամանակ, «Հայաստան» խմբակցության պատգամավոր Լեւոն Քոչարյանը հարց ուղղեց վարչապետ Նիկոլ Փաշինյանին, ինչին պատասխանելու փոխարեն Փաշինյանը սպառնալից տոնով պատգամավորին հորդորեց հիշել, թե որտեղ է գտնվում։
Լեւոն Քոչարյանը, մասնավորապես, անդրադառնալով Ադրբեջանի նախագահի վերջին «խայտառակ ագրեսիվ» հարցազրույցին եւ դրան Փաշինյանի «խեղճուկրակ» պատասխանին՝ հարց ուղղեց Փաշինյանին. «Ինչո՞ւ եք այդքան վախեցած։ Արձանագրում եք, որ բոլոր առաջարկներն Ալիեւը մերժում է։ Հիմա էլ նոր բան եք առաջարկում՝ սպառազինությունների փոխադարձ վերահսկում։ Անկեղծ ասեք՝ միամի՞տ եք, թե՞ ուրիշ բան։ Ալիեւը թո՞ւյլ է տալու քեզ վերահսկել իր սպառազինությունները, թե՞ սա էլ է միակողմանի զիջում լինելու»,– ասաց Լեւոն Քոչարյանը՝ նկատելով, որ կեղծ խաղաղությունը ձախողված օրակարգ է, եւ եզրափակեց. «Ինքդ էլ ես ձախողված»։
Մինչեւ այդ հանգիստ նստած ՔՊ–ականների շարքերում իրարանցում սկսվեց այն պահին, երբ Լեւոն Քոչարյանը «դու»–ի անցավ։ Հատկապես ակտիվ էր նստած տեղից աղմկում Վահագն Ալեքսանյանը։ ԱԺ նախագահ Ալեն Սիմոնյանը, փորձելով կարգի հրավիրել պատգամավորներին եւ շտապելով պաշտպանել Փաշինյանին՝ Լեւոն Քոչարյանին հորդորեց կոռեկտ լինել «Հայաստանի Հանրապետության ընտրված վարչապետի հետ խոսելիս»։
Մոտենալով ամբիոնին՝ Փաշինյանը Լեւոն Քոչարյանին հորդորեց պատշաճ պահել իրեն Ազգային ժողովում։ «Հակառակ դեպքում, կարծում եմ, առիթներ կունենանք վերհիշելու, թե որտեղ եք գտնվում։ Հույս ունեմ՝ այս հորդորը կրկնելու առիթ չեք տա»։
Արձագանքելով Փաշինյանին՝ Լեւոն Քոչարյանը հայտարարեց, որ ինքը հստակ հարց է հնչեցրել, որի Փաշինյանը պետք է պատասխաներ, մինչդեռ «հազարավոր զոհերի եւ հայրենիքի կորստի ուղիղ պատասխանատուն» ինչ–որ հորդորներ է հնչեցնում։
