Ուղղված են Միությանը. Ի՞նչ է նշանակում Փաշինյանի այցը Սանկտ Պետերբուրգ
ՎԵՐԼՈՒԾՈՒԹՅՈՒՆՆԵՐ
Iz.ru-ն գրում է, որ Հայաստանի վարչապետ Նիկոլ Փաշինյանը երկօրյա այցով ժամանել է Սանկտ Պետերբուրգ։ Նա նախ մասնակցել է ԵԱՏՄ շրջանակներում հանդիպման, ապա մասնակցել ԱՊՀ ոչ պաշտոնական գագաթնաժողովին։ Ուղևորությունը Հայաստանի ղեկավարի համար առաջինն էր Ղարաբաղի կորստից և Ռուսաստանի հետ վեճերից հետո։ «Iz.ru» փորձել է հասկանալ, թե ինչպես են փոխվել Երևանի և Մոսկվայի հարաբերությունները։
ՄԳԻՄՕ-ի Կովկասյան հիմնախնդիրների և տարածաշրջանային անվտանգության կենտրոնի առաջատար գիտաշխատող Նիկոլայ Սիլաևը Փաշինյանի Սանկտ Պետերբուրգ այցը լավ ազդանշան է համարել։
— Հայաստանը վերջին ամիսներին եռանդուն կերպով փչացնում էր հարաբերությունները Ռուսաստանի հետ։ Կուզենայի հավատալ, որ էմոցիաները ինչ-որ չափով հանդարտվել են, կրքերի սրությունը մարել է։ Այս այցը ես համարում եմ դիվանագիտական մեծ հաջողություն երկու երկրների համար։ Հուսով եմ, որ Երևանի և Մոսկվայի միջև փոխգործակցությունն այժմ ավելի կառուցողական կլինի, և բացասական ուղղությամբ սահքը կդադարի,- ասել է նա։
ՄԳԻՄՕ-ի կովկասյան սեկտորի ղեկավար Վադիմ Մուխանովն էլ պնդում է, որ հարաբերություններում դժվարություններ կան, բայց դրանք չպետք է չափազանցնել։
— Այո, հայտարարությունները բավականին կոշտ էին հնչում, բայց դրանք գրեթե երբեք չվերածվեցին որոշումների ու գործողությունների։ Հայաստանը դեռևս ԵԱՏՄ-ի, ՀԱՊԿ-ի և ԱՊՀ անդամ է, ռուսական ռազմակայանն ապահովում է այդ Անդրկովկասյան հանրապետության անվտանգությունը, և երկկողմ համաձայնագրերը շարունակում են աշխատել։ Այո, կան որոշակի կոծտ եզրեր, մենք հավանաբար կարող ենք նկատել Երևանի կողմից բազմավեկտոր քաղաքականության անցնելու փորձ։ Բայց գլխավորը չի փոխվել՝ Ռուսաստանն ու Հայաստանը մնում են դաշնակիցներ։ Փաշինյանի այցը ընդգծում է այդ փաստը,- նշել է նա։
Նյութը հրապարակման պատրաստեց Կամո Խաչիկյանը
