Դատապարտվեց 20 տարվա ազատազրկման. աղմկահարույց սպանության գործով կայացվել է մեղադրական դատավճիռ

ՀԱՍԱՐԱԿՈՒԹՅՈՒՆ 21 Июнь, 2016 20:10

Լոռու մարզի ընդհանուր իրավասության առաջին ատյանի դատարանը աղմկահարույց սպանության գործով կայացրել է մեղադրական դատավճիռ:

Խոսքը ընկերոջ հորաքրոջը բռնաբարելու ու սպանելու սահմռկեցուցիչ դեպքի մասին է:

26-ամյա Արթուր Ղավալյանը մեղավոր է ճանաչվել ոչ միայն սպանության, այլև ընկերոջը սպանելու փորձ կատարելու ու մի շարք այլ մեղադրանքներում՝ ողջ ծավալով, ու դատապարտվել ընդհանուր առմամբ 20 տարվա ազատազրկման:

Դատարանն ապացուցված է համարել, որ Արթուր Ղավալյանը, 2014 թվականի սեպտեմբերի 18-ին` ժամը 20:30-ից մինչև 22:30-ն ընկած ժամանակահատվածում, ալկոհոլային հարբածության վիճակում, նախապես ցանկություն ունենալով սեռական հարաբերության մեջ մտնել իր ընկերոջ հորաքրոջ հետ և իմանալով, որ նա տանը միայնակ է, մուտք է գործել նրա առանձնատուն և փորձել սեռական հարաբարերության մեջ մտնել նրա հետ:

Հանդիպելով կնոջ դիմադրությանը, ըստ դատարանի կողմից հաստատված մեղադրանքի, Արթուր Ղավալյանը՝ օգտագործելով իր ֆիզիկական առավելությունները, կնոջ նկատմամբ շարունակել է բռնություն գործադրել և կոտրելով նրա դիմադրությունը, բռնաբարել և սեքսուալ բնույթի բռնի գործողություններ է կատարել նրա նկատմամբ, ապա սուր կտրող-ծակող գործիքով բազմակի հարվածներ է հասցրել նրա մարմնի տարբեր մասերին և սպանել նրան: Այնուհետև դեռևս գտնվելով բնակարանում, Արթուր Ղավալյանը տեսնելով, որ դրսից նկատել են իրեն, տնից վերցրել է 2 խոհանոցային դանակ և կիսամերկ վիճակում դուրս եկել բնակարանի մուտքի դռնով, ապա հանդիպելով իրեն բռնել ցանկացող ընկերոջը՝ սպանված կնոջ եղբորորդուն, ձեռքին պահած դանակներից մեկը նետել է նրա ուղղությամբ, որպեսզի նրան շրջանցի և փախչի: Սակայն ընկերը փորձել է կանխել նրա փախուստը, ապա ամբաստանյալը ձեռքին եղած մյուս խոհանոցային դանակով հարվածել է նրա կրծքավանդակի առաջնային մակերեսի ձախ կեսի շրջանում և նրա առողջությանը պատճառել կյանքին վտանգ սպառնացող ծանր վնաս: Հանցագործությունը ավարտին չի հասցվել, քանի որ սպանված կնոջ եղբորորդին դիմել է անհրաժեշտ պաշտպանության, իր մոտ գտնվող գրպանի դանակի գործադրմամբ 2-3 անգամ հարվածել Արթուր Ղավալյանին: Վերջինիս հաջողվել է շրջանցել կյանքի համար վտանգավոր մարմնական վնասվածք ստացած տղամարդուն և դիմել փախուստի:

Ընկերոջ հորաքրոջը բռնաբարել է, հետո՝ սպանել
Բացի սպանության ու սպանության փորձի, ինչպես նաև սեռական բնույթի հանցագործություններ կատարելու մեղադրանքներից՝ դատարանը հաստատված է համարել նաև մինչ աղմկահարույց այդ սպանությունը գողության ու առանց հափշտակելու նպատակի ուրիշի ավտոմեքենային տիրանալու մեղադրանքները: Ըստ դատավճռի, 2014 թվականի օգոստոսի լույս 26-ի գիշերը Վանաձորի մի առանձնատան բակից առանց հափշտակելու նպատակի ամբաստանյալն ապօրինաբար ավտոմեքենայի է տիրացել, դրանով նույն օրը՝ ժամը 03-ի սահմաններում գնացել է Արագածոտնի մարզի Ծիլքար գյուղ և այնտեղ մի բնակարան մուտք գործելով՝ այնտեղից գաղտնի հափշտակել է շուրջ 463.000 ՀՀ դրամ ընդհանուր արժողությամբ դյուրակիր համակարգիչ համակցվող դետալների և պայուսակի հետ, բջջային հեռախոս, տանտիրոջը պատկանող ավտոմքենայի բանալիները և նրա հարսին պատկանող պայուսակը` 15000 ՀՀ դրամ, բիժու թևնոցի ու մեկ զույգ ականջօղերի պարունակությամբ: Տեսնելով, որ տան անդամները արթնացել են, նշված ապրանքները ձեռքին մուտքի դռնով դիմել է փախուստի, իսկ Վանաձորում տիրացած ավտոմեքենան թողել այդ տան բակում:

Դատարանն որպես ամբաստանյալ Արթուր Ղավալյանի պատասխանատվությունը և պատիժը ծանրացնող հանգամանքներ հաշվի է առել այն, որ նա ՀՀ քրեական օրենսգրքի 104-րդ հոդվածի 2-րդ մասի 12-րդ կետով՝ բռնաբարությամբ կամ սեքսուալ բնույթի բռնի գործողություններով զուգորդված սպանություն, 34-104-րդ հոդվածի 1-ին մասով՝ սպանության փորձ, 138-րդ հոդվածի 1-ին մասով՝ բռնաբարություն, և 139-րդ հոդվածի 1-ին մասով՝ սեքսուալ բնույթի բռնի գործողություններ, նախատեսված հանցագործությունները կատարել է ալկոհոլային հարբածության վիճակում:

Դատարանն այսպիսով ամբաստանյալ Արթուր Ղավալյանին մեղավոր է ճանաչել Հայաստանի Հանրապետության քրեական օրենսգրքի 104-րդ հոդվածի 2-րդ մասի 12-րդ կետով, 34-104-րդ հոդվածի 1-ին մասով, 138-րդ հոդվածի 1-ին մասով, 139-րդ հոդվածի 1-ին մասով, 177-րդ հոդվածի 3-րդ մասի 1.1 կետով՝ բնակարան ապօրինի մուտք գործելու միջոցով գողոթյուն, և 183-րդ հոդվածի 1-ին մասով՝ առանց հափշտակելու նպատակի ավտոմեքենային ապօրինի տիրանալը, նախատեսված հանցագործությունների կատարման մեջ: