«Ուղղվածություն դեպի երկրների նոր առանցք». Հայաստանը ձեռք է բերել հնդկական ՆԱՏՕ-ի տիպի MArG անիվավոր հաուբիցներ
ՎԵՐԼՈՒԾՈՒԹՅՈՒՆՆԵՐ
Topwar.ru–ն գրում է, որ Հնդկական Bharat Forge Kalyani Group ընկերությունը հայտարարել է Հայաստանի հետ խոշոր գործարք կնքելու մասին, որը նախատեսում է կատարելագործված անիվավոր ինքնագնաց 155 մմ MArG հաուբիցների և նմանատիպ տրամաչափի, այսինքն ՆԱՏՕ-ի մոդելի ATAG հրանոթների վաճառք։
Այս մասին հայտնել է IDRW հրատարակությունը։ Հնարավոր պայմանավորվածությունը քննարկվել է ՀՀ պաշտպանության նախարար Սուրեն Պապիկյանի 2022 թվականի հոկտեմբերին Գանդինագարում անցկացվող DefExpo 2022 ցուցահանդեսին այցից հետո, որտեղ Հնդկաստանը ցուցադրել էր իր արտադրության զենքերն ու պաշտպանական համակարգերը։
155 մմ MArG 39 cal BR ինքնագնաց հրանոթային համակարգը, որը կշռում է 18 տոննա, ի վիճակի է կրակել ՆԱՏՕ-ի ստանդարտ արկերով: Հրանոթը լիցքավորվում է 18 արկով, իսկ մարտական պատրաստության բերելու ժամանակը ցերեկը 1,5 րոպե է, գիշերը 2 րոպե: Այդ գործարքը երկրների միջև մի շարք պաշտպանական պայմանագրերի մի մասն է կազմում: Այսպես, 2022 թվականի սեպտեմբերին Երևանը Նյու Դելիից պատվիրել է 245 միլիոն դոլարի Pinaka զենիթահրթիռային համակարգեր, իսկ 2020 թվականին 40 միլիոն դոլարի Swathi շարժական ռադարներ։
Պաշտպանական համագործակցության աճը կապված է Հնդկաստանն իր կողմը «շահելու» Հայաստանի ղեկավարության փորձերի հետ։ «Երևանը վարում է Հնդկաստան-Իրան-Հայաստան երկրների նոր առանցքի ձևավորման կուրս ի հակադրություն Պակիստան-Ադրբեջան-Թուրքիա դաշինքի»,- նշել է The Economic Times հրատարակությունը։ Նաև նշվել է, որ Հայաստանի ղեկավարությունը հանդես է եկել նախաձեռնությունների մի ամբողջ շարքով։ Հնդկաստանը հրավիրված է մասնակցելու շինարարությանը, արդյունաբերական արտադրությանը և զբոսաշրջային ենթակառուցվածքների զարգացմանը։
«Հայաստանը տնտեսական հզոր աճ է գրանցել չնայած պատերազմին։ Ներկայումս շինարարության ոլորտում բում է, և մենք բանակցություններ ենք վարում հնդկական ընկերությունների հետ»,- օրերս հայտարարել է ԱԳ նախարարի տեղակալ Մնացական Սաֆարյանը։
Երկու երկրների միջև արտաքին առևտրային հարաբերություններն ակտիվացնելու համար Երևանը խնդրել է իրանական Չաբահար նավահանգստի միջոցով մուտք գործել հնդկական շուկա, և ըստ ամենայնի, խոսքը գնում է ներմուծման արտոնյալ պայմանների ապահովման մասին։ Միաժամանակ նախատեսվում է հայկական ապրանքներն այնտեղ հասցնել Հյուսիս-Հարավ տրանսպորտային միջանցքով, որի ստեղծման հիմքում հիմնականում Ռուսաստանն է։
Նյութը հրապարակման պատրաստեց Կամո Խաչիկյանը
