Քաղաքագետը պարզաբանել է Փաշինյանի դիրքորոշումը ՀԱՊԿ-ի վերաբերյալ
ՎԵՐԼՈՒԾՈՒԹՅՈՒՆՆԵՐ
Iz.ru-ն գրում է, որ Հայաստանի վարչապետ Նիկոլ Փաշինյանի դիրքորոշումը Հավաքական անվտանգության պայմանագրի կազմակերպության (ՀԱՊԿ) վերաբերյալ արևմտյան ստանդարտ սցենար է, «iz.ru»-ի հետ զրույցում նշել է Հումանիտար և քաղաքական հետազոտությունների միջազգային ինստիտուտի քաղաքագետ Վլադիմիր Բրուտերը: Ըստ նրա Հայաստանի իշխանություններն իրենց գործողություններով կնախաձեռնեն դաշինքից դուրս գալը:
Հիշեցնենք, որ ավելի վաղ Փաշինյանը հայտարարել էր, որ Հայաստանը, հրաժարվելով մասնակցել ՀԱՊԿ միջոցառումներին, ոչ թե հող է նախապատրաստում կազմակերպությունից դուրս գալու համար, այլ իրեն և դաշինքին ժամանակ է տալիս հետագա քայլերի մասին մտածելու համար։
«Ստանդարտ սցենարն արևմտյան է: Կարծես ասում են, որ դա Ռուսաստանի մեղքն է, բայց մենք դուրս չենք գալիս։ Ռուսաստանն է, որ մեզ դուրս է մղում։ Նրանք պարզապես սպասում են, որ Ռուսաստանն ինչ-որ պահի կկորցնի նյարդերը և ցույց կտա դուռը»,- ասել է Բրուտերը։ Քաղաքագետը նաև հավելել է, որ Հայաստանի իշխանությունները ՀԱՊԿ-ից դուրս գալու նախաձեռնությամբ հանդես չեն գալու, այլ այլընտրանք և դրսից մեղավորներ են փնտրելու։
Նախօրեին Փաշինյանը հայտարարել էր, որ չի կարող մասնակցել Մինսկում կայանալիք ՀԱՊԿ գագաթնաժողովին, որը տեղի կունենա նոյեմբերի վերջին։ Ինչին ի պատասխան Բելառուսի նախագահ Ալեքսանդր Լուկաշենկոն Հայաստանի վարչապետին առաջարկել է հապճեպ որոշումներ չընդունել։ ՌԴ նախագահի մամուլի քարտուղար Դմիտրի Պեսկովն այդ առիթով ասել է, որ Մոսկվան ափսոսում է Փաշինյանի գագաթնաժողովին մասնակցելուց հրաժարվելու համար։ Կրեմլի պաշտոնյան նշել է, որ նման հանդիպումները լավ հնարավորություն են «ժամացույցները ուղղելու» համար։
Հոկտեմբերի վերջին Փաշինյանը նշել էր, որ Հայաստանը մնում է ՀԱՊԿ-ի մաս, քանի որ կողմերը գտնվում են դիրքորոշումների համադրման փուլում, և Երևանը չի ցանկանում սխալվել։
Հայաստանի և ՀԱՊԿ-ի հարաբերությունները վատթարացել են 2022 թվականի նոյեմբերին, երբ Փաշինյանը հրաժարվեց ստորագրել ՀԱՊԿ-ի «Հայաստանի Հանրապետությանը օժանդակելու համատեղ միջոցառումների մասին» հռչակագրի նախագիծը, Փաշինյանի խոսքով Լեռնային Ղարաբաղում իրավիճակին հստակ քաղաքական գնահատական չտալու պատճառով։ Ավելի ուշ՝ 2023 թվականի մայիսին, Հայաստանի վարչապետը հնարավոր է համարել իր երկրի դուրս գալը ՀԱՊԿ-ից։ Բացի այդ, սեպտեմբերին երկրի նախագահ Վահագն Խաչատուրյանը հրամանագիր է ստորագրել ՀԱՊԿ-ում հանրապետության մշտական ներկայացուցիչ Վիկտոր Բիյագովին հետ կանչելու մասին։
Նյութը հրապարակման պատրաստեց Կամո Խաչիկյանը
