Քաղաքացիները կարող են առցանց հարթակում սուբվենցիոն ծրագրեր ներկայացնել. Սա փորձնական ծրագիր է. Փաշինյան
ՔԱՂԱՔԱԿԱՆՈՒԹՅՈՒՆ
Մենք որոշել ենք սուբվենցիոն ծրագրերը որոշելիս ներգրավել նաեւ քաղաքացիներին, ծրագրային որոշակի շրջանակներում քաղաքացիները կարող են էլեկտրոնային հարթակների միջոցով առաջարկել, որ եկեք հաջորդ տարի մեր քաղաքում իրականացնել այսինչ ծրագիրը: Այս մասին այսօր՝ նոյեմբերի 2-ին, կառավարության նիստում ՀՀ համայնքներում մասնակցային բյուջետավորմամբ ձևավորված ծրագրերի իրականացման նպատակով 2024-ի բյուջեից համայնքներին սուբվենցիաների տրամադրման կարգը հաստատելու մասին հարցի քննարկման ժամանակ նշեց ՀՀ վարչապետ Նիկոլ Փաշինյանը:
«Եթե քաղաքացիները այդ ծրագրին հավանություն են տալիս, այդ դեպքում կառավարությունն առնվազն 80 տոկոս ֆինանսավորում է քաղաքացիների կողմից որոշված ծրագիրը: Սա չի նշանակում, որ հին համակարգը էլի չկա: Պարզապես մենք նոր բաղադրիչ ենք մտցնում, եւ քաղաքացիները հնարավորություն են ունենում իրենց նախագծերն առաջ մղել: Այստեղ կարեւորն այն է, որ ունենանք առցանց պատշաճ հարթակներ, որպեսզի վստահելի պրոցեսներ տեղի ունենան:
Մենք մեր միջազգային գործընկերների աջակցությամբ 4 համայնքում ունենք հավաստիացում, որ այդպիսի վստահելի առցանց հրթակներ ունենք՝ Աշտարակ, Աբովյան, Արմավիր, ջերմուկ: Սա փորձնական ծրագիր է եւ 2024-ի բյուջեի շրջանակներում միջոցները նախատեսել ենք: Այնպես որ, այդ համայնքների բնակիչներն արդեն կարող են մտածել նախաձեռնությունների մասին»,- հայտարարեց Փաշինյանը:
