ՊՆ-ն տեղեկացնում է
ՀԱՍԱՐԱԿՈՒԹՅՈՒՆ
ՀՀ ՊՆ-ն կամ ԶՈՒ ԳՇ-ն «ՈՄԱ» հասարակական կազմակերպությանը ինժեներական աշխատանքների կատարման թույլտվություն չի տվել և «ՈՄԱ»-ն «պաշտպանական երկրորդ գծում», ինչպես նաև ՀՀ ԶՈՒ պատասխանատվության գոտիներում ինժեներական աշխատանքներ չի կատարել և չի կատարում։ Այս մասին Tert.am-ի գրավոր հարցմանն ի պատասխան տեղեկացրել են ՀՀ ՊՆ-ից։
Ռազմական գերատեսչությունից նաև պարզաբանել են, որ «ՈՄԱ»-ի հիշյալ նախաձեռնությունն, ինչպես նաև առհասարակ որևէ դրամահավաք ՊՆ-ի հետ համաձայնեցված չէ։
«ՀՀ ԶՈՒ-ն սահմանային և թիկունքային պահպանության տեղամասերում ամրաշինական և ինժեներական աշխատանքները պատշաճ իրականացնում է և այն իրականացնելու ընթացքում նյութական և ֆինանսական աջակցության կարիք չունի։ ՀՀ պետական բյուջեից ՊՆ-ին այդ նպատակով հատկացված ֆինանսական միջոցները լիովին բավարար են նշված աշխատանքները հավուր պատշաճի կազմակերպելու համար»,- մատնանշել են ՊՆ-ից։
Մինչդեռ ՈՄԱ-ի ծրագրերի պատասխանատու Էդգար Մարգարյանը՝ Tert.am-ի հետ զրույցում վստահեցրեց, որ «Գմբեթ 2» նախագծով սահմանային գոտում կառուցվող փայտահողային պաշտպանական կետերի մասին ՊՆ-ն տեղյակ է։
Նրա փոխանցմամբ՝ փայտահողային պաշտպանական կետեր կառուցում են սահմանային գոտու 2-րդ և 3-րդ պաշտպանական գծերում։
«Այդ պաշտպանական կետերը բլուրների շուրջ ենք կառուցում, քաղաքների շուրջ՝ դիրքերի հետևի հատվածներում։ ՊՆ-ն գիտի, թե ինչ ենք անում, միասին ենք որոշում։ Հրամանատարությունը տեղյակ է, գալիս են, նայում են, ընդունում են։ Տեղ կա, որ տագնապների ժամանակ իրենք այդտեղ են նստում՝ «Գմբեթ»-ի կառուցած կետերում, որովհետև դա իրենց թիկունքն է։ Տեղեր էլ կան, որ թույլ չեն տալիս»,- մեկնաբանեց ռազմահասարակական ՀԿ-ի ծրագրերի պատասխանատուն։
ՈՄԱ-ի ներկայացուցիչի պնդմամբ՝ իրենք որևէ պաշտպանական կետ կառուցելու հարցում չեն կարող ինքնագլուխ որոշումներ կայացնել, այդ ամենը փոխադարձ պայմանավորվածությամբ է տեղի ունենում։
«Տեղում հրամանատարը գիտի, թե ինչ է կատարվում, մենք չեն կարող գալ, ինքնագլուխ որևէ բան կառուցել, թողնել-գնալ և իրենց ոչինչ չասել»,-հայտնեց նա։
Նշենք, որ ՈՄԱ-ի նախաձեռնությամբ կազմակերպվում է «Գմբեթ 2» նախագիծը, որի շրջանակներում սահմանային գոտում կառուցվելու են փայտահողային պաշտպանական կետեր։
Մինչ այս եղել է «Գմբեթ 1»-ը, որի ընթացքում կառուցվել են երկարաժամկետ պաշտպանական կետեր։
Ծրագրով 80 կրակակետ արդեն կառուցվել է, ևս 25-ը կառուցման փուլում է։
Արցախում տեղի ունեցող իրավիճակից ելնելով՝ ավելացել են ՈՄԱ-ի «Գմբեթ 2»-ի աջակիցները՝ երգիչներ, բլոգերներ դերասաններ, ուսանողներ և պարզապես հասարակ մարդիկ, ովքեր մտածում են պետության ամրության և ապահովության մասին և սոցցանցերի իրենց էջերում դրամահավաքի կոչեր հնչեցնում։
Չնայած այս ամենին, համացանցում այս նախագծի վերաբերյալ հանդիպում ենք և՛ լավ, և՛ վատ կարծիքների։ Որոշ օգտատերեր ասում են, որ «Գմբեթ 2»-ի ժամանակը չէ, Արցախից տեղահանված մարդկանց պետք է օգնել և որ պաշտպանական կետեր կառուցելն ամենևին էլ անհատների գործը չէ։
