ԱԳ նախարար. Կանադան Հայաստանի ժողովրդի կողքին է, աջակցում է նրա անկախությանը
ՔԱՂԱՔԱԿԱՆՈՒԹՅՈՒՆ
Հայաստանը բարձր է գնահատում սեպտեմբերի 19-ին ադրբեջանական ագրեսիայից հետո հաստատված Կանադայի սկզբունքային դիրքորոշումը։ Այս մասին Երեւանում, հոկտեմբերի 25-ին Կանադայի ԱԳ նախարար Մելանի Ժոլիի հետ համատեղ ասուլիսում ասել է Հայաստանի արտգործնախարար Արարատ Միրզոյանը։
Միրզոյանը նշեց, որ սա Կանադայի ԱԳՆ ղեկավարի առաջին այցն է Հայաստան, հատկապես կարևոր է, որ այցի շրջանակներում տեղի կունենա Հայաստանում Կանադայի դեսպանատան բացումը։ Նախարարը հիշեցրեց, որ դեսպանատունը բացվում է «Հայկական ժողովրդավարության խթանում» զեկույցի արդյունքների հիման վրա և վստահություն հայտնեց, որ զեկույցի մյուս առաջարկները համատեղ ջանքերով կիրականացվեն՝ որպես յուրատեսակ ճանապարհային քարտեզ։
Նրա խոսքով, երկու երկրների հարաբերությունները հիմնված են ընդհանուր արժեքների վրա, ինչպիսիք են ժողովրդավարությունը, օրենքի գերակայությունը և մարդու իրավունքները։ Սա լայն դաշտ է ստեղծում Հայաստանի Հանրապետությունում ժողովրդավարական ինստիտուտների ամրապնդման համար։ Կողմերը տեսնում են առեւտրատնտեսական հարաբերությունների ակտիվացման հնարավորություններ։ Նշվել է նաև Կանադայի հայ համայնքի դերը։
ՀՀ ԱԳ նախարարը ողջունել է Կանադայի միացումը ԵՄ առաքելությանը` ընդգծելով, որ տարածաշրջանին անհրաժեշտ են արդյունավետ քայլեր խաղաղության հաստատման համար։
Միրզոյանն ասաց, որ Հայաստանը բարձր է գնահատում սեպտեմբերի 19-ին ադրբեջանական ագրեսիայից հետո Կանադայի հայտարարած սկզբունքային դիրքորոշումը։ Նախարարը հայտարարեց, որ միջազգային հանրության բոլոր կոչերը և միջազգային դատարանի երկու որոշումները գործնական ազդեցություն չեն ունեցել, և Ադրբեջանը էթնիկ զտումներ է իրականացրել։ Այս առնչությամբ Արարատ Միրզոյանը նշեց, որ կան մեխանիզմներ, որոնք կարող են հակադարձել անպատժելիության իրավիճակին, և շնորհակալություն հայտնեց Կանադայի կառավարությանը՝ Լեռնային Ղարաբաղից փախստականներին մարդասիրական օգնության համար։
Նախարարն ասաց, որ իր գործընկերոջ հետ քննարկել է տարածաշրջանում ստեղծված իրավիճակը։ Ինչպես ընդգծել է ԱԳՆ ղեկավարը, Հայաստանի և Ադրբեջանի կողմից տարածքային ամբողջականության փոխադարձ ճանաչումն անհրաժեշտ է՝ բացառելով մաքսիմալիստական նկրտումները և սահմանների սահմանազատումը ԽՍՀՄ Գլխավոր շտաբի քարտեզների հիման վրա։
«Մենք շահագրգռված ենք նաև հավասարության, ինքնիշխանության փոխադարձության սկզբունքների հիման վրա հաղորդակցությունների ապաշրջափակմամբ՝ դրանով իսկ ստեղծելով խաղաղության խաչմերուկ»,- ասել է Միրզոյանը։
Իր հերթին, Կանադայի ԱԳՆ ղեկավարն ասել է, որ սա իր երկրորդ այցն է. առաջինը եղել է Ֆրանկոֆոնիայի շրջանակներում։ «Կանադան Հայաստանի ժողովրդի կողքին է, աջակցում է նրա անկախությանը, հավատում է ժողովրդավարական ձգտումներին»,- ասաց նախարարը։
