Փաշինյանը փորձում է շեղել կասկածները
ՎԵՐԼՈՒԾՈՒԹՅՈՒՆՆԵՐ
Հայաստանի գործող իշխանությունները հիմա էլ փորձում են համոզել, թե իրենք ոչ մի կապ չունեն հոկտեմբերի 20-ին Երևանում Արցախի ներկայացուցչության մոտ տեղի ունեցած զանգվածային անկարգություններից և խժդժություններից։ Քննչական կոմիտեից հայտնել են, թե ներկայացուցչության շենքի դիմաց տեղի ունեցած ակցիայի ընթացքում հանցավոր արարքներ կատարելու կասկածանքով 10 անձ է ձերբակալվել, Արցախի նախագահի աշխատակազմի ղեկավար Կարեն Շահրամանյանը ճանաչվել է տուժող։
Քննչական կոմիտեն հաղորդումներ է ստացել քաշքշոցների, ձեռքերով մեկ անձին հարվածներ հասցնելու, Տոյոտա մեքենան վնասելու, անհայտ հանգամանքներում մեքենայի սրահի պահոցից խոշոր գումարի անհետացման, բջջային հեռախոսի և պետհամարանիշի գողության վերաբերյալ։ Ձերբակալված 10 անձանց ինքնությունը չի հաղորդվում, սակայն իրավապահ մարմիններում, մեր աղբյուրների փոխանցմամբ, ձերբակալվածները պարզապես շարքային արցախցիներ են, որոնց հրահրել էին, իսկ հիմնական սադրիչները, որ այնտեղ էին ժամանել Արցախի անվտանգության խորհրդի նախկին քարտուղար Սամվել Բաբայանի կողմնակիցների ուղորդմամբ, որևէ պատժի չեն արժանցել և կարողացել են «բարեհաջող» կերպով լքել տարածքը։
Արցախի իշխանությունները հայտարարությամբ դատապարտել են հոկտեմբերի 20-ին տեղի ունեցածը՝ նշելով, որ քաղաքացիները փորձել են հրահրել զանգվածային անկարգություններ, մինչդեռ Սամվել Շահրամանյանը պատրաստ է եղել հանդիպմանը, իսկ արդեն փակ հանդիպմանը քաղաքացիները բարձրացրել են մի շարք սոցիալական, այդ թվում՝ Հայասատանում կացարանով ապահոված չլինելու հետ կապված խնդիրներ։
Արցախի ներկայացուցչության մոտ տեղի ունեցածը, ըստ ամենայնի, վերջինը չի լինելու։ Հայաստանի գործող իշխանությունները փորձում են ոչ միայն ճնշման և կրնկի տակ պահել Արցախի՝ Հայաստան տեղափոխված իշխանություններին և նրանց կողմնակիցներին, այլև քրեական տարբեր գործեր հարուցելով՝ զրկել, կամ էլ պարտադրել զերծ մնալ ընդդիմության հետ համագործակցությունից, հատկապես այն, երբ Արցախից Հայաստան տեղափոխված 100 հազարից ավելի մարդկանց մեծ մասը կարողացել է որոշակի միջոցներ հայթայթել, կամ պետությունից ստանալ իր կացարանն ու սնունդը ապահովելու համար և շոկից դուրս գալուց հետո, արցախցիները լեգիտիմ հարցեր ունեն փաշինյանական իշխանությանը, թե ինչու՞ ամեն ինչ արեցին Արցախն Ադրբեջանին հանձնելու համար։
Գայանե Սիմոնյան
