Արցախի բյուջեն չի յուրացվել. Շտաբը հերքում է տարածվող կեղծիքները

Արցախի տեղեկատվական շտաբը հայտարարություն է տարածել՝ նշելով, թե պետական բյուջեից գումարների յուրացման և ծառայողական մեքենաների սեփականաշնորհման մասին համացանցում որոշ օգտատերերի կողմից շրջանառվող լուրերը կեղծ են։

Շտաբը նաև նշել է, թե վերջին ռազմական գործողություններից հետո պետական բյուջեից կատարված ամբողջ ծախսը կազմել է շուրջ 463 միլիոն դրամ։ Ներկայումս արցախի հանրապետության պետական բյուջեի գանձապետական հաշիվներում շարունակում է մնալ շուրջ 3,1 միլիարդ դրամի մնացորդ, որը սառեցված է և որևէ գործարք չի իրականացվում։

Փաշինյանին սպասարկող մամուլն ու օգտատերերը տեղեկություններ են տարածել՝ փորձելով այդկերպ անվանարկել Արցախի վտարանդի իշխանություններին: Lավ է, որ Արցախի տեղեկատվական շտաբը հերքում է այս տեղեկությունները, սակայն ցավալիորեն պետք է նշել, որ Հայաստանի գործող վարչախմբին հաջողվում է սեպ խրել արդեն ոչ թե հայաստանցիների և ղարաբաղցիների միջև, այլ բուն արցախցիների միջև՝ շարքային արցախցիներին հանելով իշխանությունների և պետական ծառայողների դեմ։

Այս քաղաքականությանն իրենց վարքով նպաստում են նաև Արցախի որոշ պետական պաշտոնյաներ և պատգամավորներ։ Օրինակ Արցախի «Արդարություն» խմբակցության պատգամավոր Մետաքսե Հակոբյանը գրել է, թե Հայաստանի իշխանությունների պարտականությունն է Արցախի պետական աշխատողների աշխատավարձերի փոխանցումը։ «Կարծում եմ, որ ոչ միայն պատգամավորները, այլ բոլորը պետք է աշխատավարձ ստանային, քանի որ բնակչության 70 %-ը պետական աշխատողներ են»,- ասել է Հակոբյանը։

Այն, որ Արցախի պետական համակարգը չափազանց ուռճացված էր, որևէ մեկի համար գաղտնիք չէ, սակայն Հայաստանը ստեղծված իրավիճակում առաջնահերթ կարիք ունի լուծելու տեղահանված և Հայաստան տեղափոխված, ինչպես նաև գումարների ու սննդի խնդիր ունեցող արցախցիների հարցերը, այլ ոչ թե պատգամավորների, որոնց աշխատանքի ՕԳԳ-ն առանձնապես երբեք էլ բարձր չի եղել, իսկ Փաշինյանին իբր քննադատող մետաքսեհակոբյանների և այլոց նման հռետորաբանությունը, ընդհակառակը, նպաստում է արցախցիների շրջանում միմյանց նկատմամբ թշնամական վերաբերմունքի ձևավորմանը։

Ժաննա Սարատիկյան