Սամվել Բաբայանի՝ առանց խնդրի Հակարիի կամրջով անցնելը հարվածի տակ է դրել հավանական սև ցուցակներում եղածներին. Աբրահամյան
ՔԱՂԱՔԱԿԱՆՈՒԹՅՈՒՆ
Սամվել Բաբայանի հայտարարությունն այն մասին, որ առանց որևէ խնդրի, առանց անձնագրային ռեժիմի, առանց առանձնահատուկ վերաբերմունքի անցել է Հակարիի կամրջով, դրանով իսկ հարվածի տակ է դրել այն մարդկանց, որոնք հավանական ադրբեջանական սև ցուցակներում են: Այս մասին այսօր՝ սեպտեմբերի 27-ին, լրագրողների հետ զրույցում ասաց ԱԺ «Պատիվ ունեմ» խմբակցության պատգամավոր Տիգրան Աբրահամյանը:
Նրա խոսքով, պատահական չէ, որ այդ հայտարարությունից հետո այսօր արդեն բազմաթիվ տեղեկություններ կան, որ տարբեր մարդկանց մեքենաներն ավելի խիստ և մի քանի անգամ ստուգվում են, նկատելի է, որ որոշ կոնկրետ մեքենաների նկատմամբ ուշադրություն կա:
«Այսինքն կա որոշակի գործողություններ, որոնց մասին վտանգավոր եմ համարում շատ փակագծեր բացել, բաց այն, որ երեկվանից Ադրբեջանը որոշակի միջոցառումներ ձեռնարկում է, դա չի սահմանափակվում միայն Ռուբեն Վարդանյանի հետ կատարվածով»,- ասաց Աբրահամյանը։
Պատգամավորը նշեց, որ ցանկացած հայի ձերբակալությունն Ադրբեջանի կողմից ոչ միայն խիստ մտահոգիչ է, այլ բոլորին պետք է մղի շատ ավելի ակտիվ գործողությունների միջազգային կառույցների, տարբեր հիմնական դերակատարների հետ. «Եթե սա չկանխվի, եթե Ադրբեջանի վրա լրացուցիչ ճնշումներ չլինեն, սա բերելու է նաև այլ ձերբակալություններ»։
Տ.Աբրահամյանի խոսքով, Սամվել Բաբայանը բացառապես սպասարկում է նիկոլփաշինյանական քարոզչական և քաղաքական օրակարգը, նրա հայտարարությունները բացառապես այդ տրամաբանության ներքո է։
Նա նաև նշեց, որ շատ բան կա խոսելու, թե ինչ է իրականում Արցախում տեղի ունեցել, ինչու է Արայիկ Հարությունյանը հրաժարական տվել, ինչու էր Արցախում ստեղծվել մի իրավիճակ, որ որևէ մեկը չէր ուզում ստանձնել այդ ծանր պահին պատասխանատվությունը։
