Շմիգալը պնդում է, որ Ուկրաինան կատարել է Եվրահանձնաժողովի բոլոր յոթ հանձնարարականները
ՄԻՋԱԶԳԱՅԻՆ
Ուկրաինայի կառավարությունը հավանություն է տվել ազգային փոքրամասնությունների և բնիկ ժողովուրդների իրավունքները պաշտպանելու ծրագրին և դրանով իսկ ավարտել Եվրահանձնաժողովի բոլոր յոթ հանձնարարականների կատարումը, որոնք Կիևը պետք է իրականացներ Եվրամիությանը անդամակցելու շուրջ բանակցությունների մեկնարկի ճանապարհին։ Այս պնդումն արել է Ուկրաինայի վարչապետ Դենիս Շմիգալը կառավարության նիստում։
«Անցյալ տարվա հունիսին մենք ստացել էինք ԵՄ անդամակցության թեկնածուի կարգավիճակ և Եվրահանձնաժողովից բարեփոխումների վերաբերյալ յոթ առաջարկություն, որոնք պետք է իրականացվեն ԵՄ-ին միանալու հաջորդ քայլի համար», - ասել է Շմիգալը իր Telegram ալիքում հրապարակված տեսանյութում: - Այսօր մենք ընդունում ենք «Միասնություն բազմազանության մեջ» պետական նպատակային ծրագիրը»։ Ըստ Շմիգալի՝ ծրագրի նպատակն է պայմաններ ստեղծել ազգային փոքրամասնությունների ու բնիկ ժողովուրդների իրավունքների ու հնարավորությունների իրացման համար։
«Այս ծրագրի հաստատումից հետո կարող ենք ասել, որ կառավարության մակարդակով մենք ամբողջությամբ ավարտել ենք Եվրահանձնաժողովի յոթ հանձնարարականների կատարումը»,- հավելել է նա։
Շմիգալն ասել է, որ Ուկրաինայի իշխանությունները կատարել են Եվրահանձնաժողովի մյուս բոլոր հանձնարարականները։ Նրա խոսքով, սկսվել է Սահմանադրական դատարանի բարեփոխումը խորհրդակցելով Վենետիկի հանձնաժողովի հետ, որը ԵԽ խորհրդատվական մարմին է, թարմացվել են Արդարադատության բարձրագույն խորհրդի և դատավորների որակավորման բարձր հանձնաժողովի կազմերը, ամրապնդվել է հակակոռուպցիոն մարմինների անկախությունը։ Բացի այդ, ստեղծվել է ֆինանսական հանցագործությունների դեմ պայքարի կարգավորող դաշտ՝ համաձայն փողերի լվացման ֆինանսական գործողությունների աշխատանքային խմբի ստանդարտների, իրականացվել են Վենետիկի հանձնաժողովի առաջարկությունները՝ օլիգարխների ազդեցությանը հակազդելու մասին օրենքի կիրարկման վերաբերյալ, ընդունվել է լրատվամիջոցների մասին նոր օրենսդրությունը։ Որպես յոթերորդ միջոց Շմիգալը անվանել է ազգային փոքրամասնությունների մասին նոր օրենքի ընդունումը և դրանում փոփոխություններ կատարելը։
