Փաշինյանի կցորդները. ավագանու ընտրություններում ՔՊ-ն մնացել է արբանյակների հույսին

Երևանի ավագանու ընտրությունների օրը մոտենալուն զուգահեռ իշխող «Քաղաքացիական պայմանագիրը» գիտակցել է, որ ակնհայտորեն չի ստացվում հաղթել ընտրություններում։ Անգամ մեծ հարց է՝ կանցնի արդյո՞ք 25-30 տոկոսի շեմը, ուստի գործի են դրել «Պլան-Բ»-ն, այն է՝ ավագանու կազմ անցկացնել արբանյակ կուսակցություններին, որպեսզի հետո կարողանան դաշինքային տրամաբանությամբ իշխանություն ձևավորել Երևանում։ Բնականաբար, ընտրություններին մասնակցող ուժերի մեծ մասը ՔՊ արբանյակներն են, սակայն Փաշինյանն ու կուսակիցները մտածել են, թե միայն Արամ Սարգսյանի «Հանրապետություն» կուսակցությունն ունի շանսեր ավագանի անցնելու, ուստի հրահանգել են ռեսուրսներ օգտագործել նրանց ավագանի անցկացնելու համար։

Զավենիչի գլխավորած կուսակցության քարոզչությունն էլ աշխարհքաղաքական իմաստով են անում, փորձում են իրենց կողմը գրավել արևմտամետ ընտրազանգվածին՝ հակառուսական տրամադրություններ գեներացնելով։ «Հանրապետությունը» վաղուց ներքաղաքական կամ քաղաքին վերաբերող կոնտենտ չունի, և անխնա չարաշահում է հակառուսական նարատիվները։ Այդ կուսակցությունը նաև վաղուց չի ասոցացվում Վազգեն Սարգսյանի հետ, քանի որ 44-օրյա պատերազմից հետո Արամ Սարգսյանի վարքը լրիվ Նիկոլ Փաշինյանի կուրսի շրջանակներում էր։

Հիմնական ընդդիմադիրներին չեզոքացնելու համար Քպ-ն նաև օգտագործում է «Լուսավոր Հայաստան»-ին, որը փաշինյանականների փոխարեն իրականացնում է սև գործը՝ հակաքարոզչություն իրականացնելով ընդդիմության, մասնավորապես, «Ապրելու երկիր» կուսակցության դեմ։ ԼՀԿ-ն մի կողմից հույս ունի, որ կփորձեն «Ապրելու երկրից» ձայներ տանել, մյուս կողմից էլ անելով ՔՊ-ի կեղտոտ գործը, վաստակում են այն պաշտոնները, որ ստացել են 2021 թվականից հետո։

Մարատ Սարգսյան