Ադրբեջանն ուզում է ուժի սպառնալիքով ստանալ այն, ինչ որ դուք եք խոստացել. Փաշինյանը՝ ընդդիմությանը
ՔԱՂԱՔԱԿԱՆՈՒԹՅՈՒՆ2022-ի ապրիլին դուք ասում էիք՝ միջազգային հանրությունը մեզ ասում է՝ մի փոքր իջեցրեք ԼՂ կարգավիճակի հարցում ձեր նշաձողը եւ մենք կապահովենք կոնսոլիդացիա Հայաստանի շուրջը: Այս մասին այսօր՝ սեպտեմբերի 13-ին, ԱԺ-ում դիմելով վարչապետ Նիկոլ Փաշինյանին, ասաց «Հայաստան» խմբակցության պատգամավոր Աննա Գրիգորյանը:
«2022-ի հոկտեմբերի 6-ին Պրահայում ընդունվեց հայտարարություն, որով ոչ միայն իջեցրեցիք Արցախի կարգավիճակի նշաձողը, այլ ուղղակի ոչնչացրեցիք այն: Դրանից հետո ի՞նչ ստացվեց: Այսօր խոսում եք այն մասին, որ պարտավորված եք եղել ՀՀ տարածքային ամբողջականությունը պահելու համար այդ հայտարարությունը ստորագրել կամ ճանաչել Արցախն Ադրբեջանի կազմում: Հիմա հարց է առաջանում. ապահովեցի՞ք Հայաստանի տարածքային ամբողջականությունը, կասեցրեցի՞ք բոլոր բոլոր հնարավոր սպառնալիքները, որոնք այսօր կան Հայաստանի առջեւ: Պատասխանը «ոչ»-ն է: Միջազգային կոնսոլիդացիայի փոխարեն ստացել ենք միջազգային մեկուսացում: Պրահայի ձեր հայտարարությամբ Արցախը այսօր հայտնվել է բլոկադայի մեջ, 120 հազար արցախցիներն էլ սովամահ են լինում»,-ասաց Աննա Գրիգորյանը:
Անդրադառնալով սահմաններին Ադրբեջանի զինուժի կուտակումներին, նա հարց ուղղեց վարչապետին. «Ի՞նչ եք անում նոր էսկալացիան թույլ չտալու համար եւ երկրորդը, ի՞նչ եք պայմանավորվել, ինչ եք խոստացել, որ Ադրբեջանն ուզում է ուժի սպառնալիքով ստանալ»:
Ի պատասխան Նիկոլ Փաշինյանն ասաց. «Ադրբեջանն ուզում է ուժի սպառնալիքով ստանալ այն, ինչ որ դուք եք խոստացել: Ադրբեջանն ուզում է ստանալ այն, ինչը դուք 1999 թվականին պայմանավորվել եք: Ուզում է ստանալ այն, ինչը դուք ավելի ուշ էլ եք պայմանավորվել, ուզում է ստանալ այն, որ Սերժ Սարգսյանը հայտարարում էր, որ մենք համաձայնել ենք դուրս գալ 7 շրջաններից, բայց ամեն անգամ Ադրբեջանը նորանոր պահանջներ էր առաջադրում: Այ դա էր ուզում ստանալ Ադրբեջանը:
Միջազգային մեկուսացման մասին եք խոսում. Այդ զենքը, որ Ադրբեջանը ձեռք է բերել, ե՞րբ է ձեռք բերել եւ որտեղից: Եւ այդ նույն ընթացքում Հայաստանն ինչքան զենք է ձեռք բերել: Այո, ճիշտ եք ասում միջազգային մեկուսացման մասին: Այն փաստը, որ Ադրբեջանը 2000-2017 թվականը, դրանից հետո էլ ձեռք է բերել տասնյակ միլիարդների զենք-զինամթերք, այդ թվում մեր ռազմավարական դաշնակցից, ամենավառ վկայությունն է այն բանի, որ մենք միջազգային մեկուսացման մեջ ենք եղել, այդ թվում մեր մերձավոր դաշնակիցների շրջանակում: Բա որտեղի՞ց է ձեռք բերել այդ զենքը, բա ինչի՞ Հայաստանը չի կարողացել այդ զենքը ձեռք բերել: Բա էդ հարցերը չեք տալի՞ս»:
Ինչ վերաբերում է նրան, թե ինչ խոստացել Ադրբեջանին, Փաշինյանն ասաց. «Ես խոստացել եմ այն, ինչի մասին հրապարակային դուք կարող եք գտնել ինտերնետում իմ խոսքերից: Դրանից դուրս ես որեւէ բան չեմ խոստացել:
Ադրբեջանն ուզում է ստանալ այն, ինչը դուք խոստացել է՝ սկսած Մեղրիի փոխանակման ծրագրից, շարունակած Ստամբուլի հռչակագրի ստորագրմամբ եւ այլն»,-ասաց Փաշինյանը:
