Մենք այս ընտրությունները դիտարկում ենք որպես պատերազմի եւ խաղաղության ընտրություն. Անդրանիկ Թեւանյան
ՔԱՂԱՔԱԿԱՆՈՒԹՅՈՒՆՄենք այս ընտրությունները դիտարկում ենք որպես պատերազմի եւ խաղաղության ընտրություն: Այս մասին այսօր՝ սեպտեմբերի 11-ին, իր ելույթում նշեց «Մայր Հայաստան» դաշինքի առաջնորդ, Երեւանի քաղաքապետի թեկնածու Անդրանիկ Թեւանյանը:
«Այս ընտրությունները օգտագործում ենք, որպեսզի իշխանափոխություն իրականացնենք եւ ապահովենք անվտանգություն եւ իրական խաղաղություն: Արդար ընտրություններով այս իշխանությունը որեւէ շանս չունի վերարտադրվելու: Կեղծիքների դեպքում մեզ տանելու է քաղաքական ցնցումների եւ պատասխանատվությունն իր վրա է մնալու: Մենք պատրաստ ենք ցանկացած զարգացման»,- նշեց Անդրանիկ Թեւանյանը:
Նրա խոսքով՝ այսօր երկիրը կանգնած է Երեւանի եւ Էրիվանի միջեւ ընտրության առաջ.
«Այս իշխանությունների վարած քաղաքականությունը բերում է Էրիվանյան իրականության, որին մենք դեմ ենք: Փաշինյանը գիտի, որ ցանկացած այլ իշխանության պարագայում դատվելու է, որովհետեւ Հայաստանի Հանրապետության անվտանգության դեմ է գործել: Որպեսզի չդատվի, ինքը հասկանում է, որ պետք է ստեղծվի մի իրավիճակ, որ ինքն է մնում իշխանության կամ Հայաստանը չի լինում, ապա չի լինի դատող սուբյեկտը, որովհետեւ դատավճիռները պետության անունից են կայացվում, իսկ եթե մնա իշխանության, ապա դրա համար անհրաժեշտ է Թուրքիայի եւ Ադրբեջանի աջակցությունը, որովհետեւ ինքն այնտեղից է ստանում հնարավորություն: Թուրքիան Հայաստանի ներքաղաքական կյանքում դարձել է գործոն եւ ազդեցությունը թողնում է եւ՛ իշխանականների, եւ՛ ամբողջ քաղաքական պրոցեսների վրա: Փաշինյանն իր իշխանության պաշտպանությունն ակնկալում է Թուրքիայից: Նա ակնկալում է, որ Արցախը Ադրբեջանին հանձնելիս դրա դիմաց ստանում է 29.800-ը՝ կադաստրի թղթով, բայց դա Թուրքիան ու Ադրբեջանը չեն տալիս: Նա մտածում է՝ ինչպես անի, որ հանձնելն իր անունից չլինի, որպեսզի իշխանափոխություն չլինի Հայաստանում, նաեւ մնա իշխանության»:
Անդրանիկ Թեւանյանը շեշտեց, որ Հայաստանը հիմա կանգնած է պատերազմի նախաշեմին. «Այժմ ասում են՝ ժողովուրդ, պատերազմ է լինելու, եթե մենք հանկարծ զիջումների չգնանք, բայ այդ զիջումներին վերջ չկա, քանի որ ինքը պետք է պատերազմի մեղավոր նշանակի, 44-օրյայի ժամանակ ասաց՝ նախկիններն են մեղավոր, հիմա այդ մեղավորներն այլ երկրներն են, մասնավորապես, Ռուսաստանը եւ մասամբ Իրանը: Փաշինյանի բոլոր քայլերը ուղղված են Ռուսաստանին ու Իրանին մեր երկրի հետ թշնամացնելու գործին: Նրանց՝ ասեք՝ կանենք-ը ուղղված է դրսի ուժերին, Էրդողանն ասում է, իրենք անում են»:
