Ներգաղթի ալիքները հանդարտվել են, բայց Հայաստանում գները շարունակում են աճել
ՎԵՐԼՈՒԾՈՒԹՅՈՒՆՆԵՐ
Eadaily.com-ը գրում է, որ ռուսաստանցիների Հայաստան տեղափոխման հիմնական պատճառը ռուս-ուկրաինական հարաբերությունների ճգնաժամն է։ Նման տեսակետով են կիսվել EADaily-ի կողմից հանրապետությունում հաստատված ռուսների շրջանում անցկացված հարցման մասնակիցները։
Ինչպես նշել է Սվյատոսլավ Նիստրատովը Սանկտ Պետերբուրգից ռուսաստանցիների մեծամասնությունը չի ցանկանում լինել պատերազմող երկրում և հեռու է մնում այս ամենից։ Ընդ որում, խոսքը ոչ միայն ռազմական գործողությունների մասին է, այլ նաև այն ամենի մասին, ինչն ուղեկցում է դրան՝ քարոզչություն, դպրոցներում նոր դասագրքեր և այլն։ Նիստրատովը նշել է, որ ինքն անձամբ Հայաստանում նորմալ է ապրում չնայած ակնհայտ բարձր գներին։
Իր հերթին Անդրեյ Սոկոլովը Մոսկվայից նշել է, որ նյութական առումով ամեն ինչ շատ լավ է ընթանում։ «Մարդը վարժվում է ամեն ինչի, և մենք բացառություն չենք։ Արդեն սովորել ենք բարձր գներին, ինչը շատ տհաճ է, բայց մենք հասկանում ենք, թե ինչու է դա տեղի ունենում։ Մենք արդեն սովորել ենք ապրել դրանով։ Միակ ուրախալին այն է, որ նյութական խնդիրներ չունենք, թեև հաճախ ուզում ենք տուն գնալ»,- նկատել է նա:
Իսկ Սանկտ Պետերբուրգից Անգելինա Սիմոնովան նշել է, որ Երևանում գներն անիրատեսական բարձր են: Ավելին, ապրանքների ինքնարժեքը տարբերվում է ռուսականից նրանով, որ դրանց գները Հայաստանի մայրաքաղաքում ավելի թանկ են, թեև աշխատավարձերն ակնհայտորեն տարբերվում են։
Հետաքրքիր է այն, որ ներգաղթի ալիքները հանդարտվել են, բայց Հայաստանում գները շարունակում են աճել։ «Մի օր ռեստորանը ներկայացրել էր 4 հազար դրամանոց ուտեստ, իսկ հաջորդ օրն այն թանկացրել էր հասցնելով է 5,8 հազար դրամի»,- դժգոհել է հարցման մասնակիցը։
Նշենք, որ ըստ Հայաստանի էկոնոմիկայի նախարար Վահան Քերոբյանի 2022 թվականի փետրվարից Հայաստան է տեղափոխվել շուրջ 118 հազար մարդ։ Նրանցից մոտ 68 հազարը էթնիկ հայեր են, իսկ մոտ 50 հազարն այլ ազգությունների ներկայացուցիչներ։ Միգրանտների ներհոսքը հանգեցրել է պահանջարկի ավելացման ի հաշիվ առաջարկի, ինչն էլ իր հերթին արտացոլվել է գնաճի վրա, որը նախորդ տարեվերջին երկրում կազմել է 8,3 %։ Միգրացիոն հոսքի նվազումը բերել է գնաճային ճնշման որոշակի նվազման։ Ըստ ՀՀ Ազգային վիճակագրական կոմիտեի տվյալների այս տարվա հունիսին նախորդ տարվա նույն ժամանակահատվածի համեմատ արձանագրվել է 0,5 %, իսկ ամսվա ընթացֆում 1,4 % գնանկում։
Հետազոտության հեղինակների կարծիքով, որն անցկացրել են նախկին ԽՍՀՄ ինը երկրներում Platforma Social Design Center-ը և OnIn հետազոտական ընկերությունը, Հայաստանում հարցվածների 73 %-ը կարծում է, որ երկիր եկած ռուսները կարող են օգտակար լինել, իսկ 63 %-ը վստահ է, որ ռուսները հիմնովին կհաստատվեն իրենց երկրում։ Սոցիոլոգները պարզել են, որ Ռուսաստանից եկածների և տեղի բնակչության միջև զգալի հոգևոր տարբերություններ չկան։
Այս տարվա հունիսին ՀՀ Կենտրոնական բանկի նախագահ Մարտին Գալստյանը, հղում անելով հարցումների տվյալներին, նշել էր ռուսաստանցիների Հայաստանում ավելի քան վեց ամիս մնալու ցանկությունը։ «Իհարկե, ես խոսում եմ իմ տեսած հարցումների մասին, քանի որ մարդկանց իրական պահվածքը կանխատեսելը շատ դժվար է: Այսպես թե այնպես, հարցումները ցույց են տալիս, որ ժամանող քաղաքացիների զգալի մասը չի ակնկալում ռուս-ուկրաինական հակամարտության շուտափույթ ավարտ, ուստի մտածում է ավելի երկար մնալ»,- ընդգծել է Գալստյանը։ Նա նաև նշել է, որ Հայաստանում ոչ ռեզիդենտ ֆիզիկական անձանց ավանդների ծավալը մեկ տարվա ընթացքում կրկնապատկվել է կազմելով 1 տրլն 132 մլրդ դրամ։ Գալստյանը նաև տեղեկացրել է, որ տեղափոխվողները հիմնականում բացում են ցպահանջ ավանդներ, այլ ոչ թե ժամկետային, ինչը վկայում է այն մասին, որ Հայաստանում մնալու նրանց ծրագրերը չեն կարող կայուն լինել:
Նյութը հրապարակման պատրաստեց Կամո Խաչիկյանը
