ՔՊ-ն եթե ձեզ տեսնի ԱԺ-ի դիմաց, ո՞նց է դեմ քվեարկելու «Հայաքվեի» առաջարկած նախագծին. Չալաբյան

Մենք այստեղ հավաքվել ենք, որ մեր միասնական կամքով նեցուկ կանգնենք մեր Արցախ աշխարհին. Արցախի մեր քույրերն ու եղբայրները իրենց անկախությունը նվաճել են սկզբում հանրքավեով, հետո մարտի դաշտում թշնամուն բազմիցս դիմագրավելով: Այս մասին, այսօր՝ սեպտեմբերի 2-ին, Ազատության հրապարակում ընդդիմության հանրահավաքում իր ելույթում նշեց «Հայաքվե» նախաձեռնության համակարգող Ավետիք Չալաբյանը:

«Մենք պետք է արժանի լինենք իրենց այսօրվա պայքարին: Հայաստանն իր ստեղծման օրվանից եղել է Արցախի անվտանգության երաշխավորը, մինչեւ վերջերս, երբ այս իշխանությունները հրաժարվեցին այդ երաշխավորությունից, Արցախին թողեցին մենակ, պաշարման մեջ՝ չունենալով դրա իրավունքը: Արցախը մեր ինքնիշխանության, մեր անկախության հռչակագրի, մեր Սահմանադրության եւ սահմանադրական կարգի հիմքում է: Ոչ մի հայ ղեկավար իրավունք չունի հանձնել Արցախը, մենք նրան նման մանդատ չենք տվել»,-ասաց նա:

Չալաբյանի խոսքով, այսօր Հայաստանում ցավոք մարդկանց մի տեսակ է առաջացել, որ մի փոր հացի, մեկ մետր ասֆալտի, խղճուկ պաշտոնի կամ մի բիզնեսի համար պատրաստ է զոհաբերել մեր հայրենիքը, մեր պատմությունը, մեր զոհերի արյունը. «Դրանց վրա է այսօր հենվում այս իշխանությունը, դրանց է շահագործում, փորձում մանիպուլացնել: Մենք լավ նորություն ունենք. Այս տեսակը չի հաղթելու իսկական հային: Իսկական հայը այստեղ կանգնած մարդիկ են: Իսկական հայը կռվում է իր երկրի համար, իսկական հայը խաղաղություն չի մուրում, այն պարտադրում է»,-հայտարարեց նա:

Անդրադառնալով «Հայաքվե» նախաձեռնությանը, Չալաբյանն ասաց, որ մեկ ամիս հետո իրենց օրենքի նխագիծը մտնելու է ԱԺ. «Ես ձեզ խնդրում եմ, բոլորդ միահամուռ այդ օրը եկեք ԱԺ-ի առաջ, տեր կանգնեք ձեր ստորագրությանը:  Մեզ ասում են՝ մեկ է, ՔՊ-ն դեմ է քվեարկելու: ՔՊ-ն եթե ձեզ տեսնի, ո՞նց է դեմ քվեարկելու, եթե ձեզ բոլորիդ տեսնի իր առաջ: Ժողովուրդը իրենց փրկօղակ է նետում. Այդ օրենքի նախագիծն ընդունելով իրենք կարող են ազատվել դավաճանի խարանից: Երբ այդ օրենքն ընդունենք, սկսելու ենք Արցախի երկրորդ ազատագրումը: Աստված զորավիգ է լինելու մեր հայրենիքին եւ մեր պայքարող տեսակին: Հաջորդ տարին Շուշիում»: