Որևէ Փաշինյան չի կարող մեզ պոկել մեր արմատներից․ Հակոբյանը՝ Լաչինի միջանցքը միակողմանի բացելու մասին
ՔԱՂԱՔԱԿԱՆՈՒԹՅՈՒՆ
Նիկոլ Փաշինյանն այսօր Կառավարության նիստում հայտարարեց, թե Ադրբեջանը ծրագրեր է մշակում Լաչինի միջանցքը միակողմանիորեն բացելու, այսինքն՝ ԼՂ-ից ելք թույլ տալու՝ մուտք թույլ չտալու ուղղությամբ։
MediaHub-ի հետ զրույցում Արցախի «Արդարություն» կուսակցության համանախագահ Հակոբ Հակոբյանը նշեց, որ հայկական երկու պետություններում վերջին շրջանում տեղեկություններ են տրվում չճշտված ձևաչափով։
«Փաշինյանի ասածի վերաբերյալ պաշտոնական լրահոսում ոչինչ չկա, բայց այսօր պաշտոնական անձի շուրթերից ոչ պաշտոնական տեղեկություն է հնչում, դեղին մամուլ է ցիտում և սրանից որևէ եզրակացություն անելը անհեթեթություն է։ Կարող ենք ենթադրել, որ Ալիևը Փաշինյանին որպես գործիք է օգտագործում, որպեսզի հայ հասարակության մեջ կեղծիք տարածի»,-ասաց նա։
Հակոբյանի խոսքով՝ Փաշինյանը կոնկրետ ադրբեջանական թեզեր է տարածում և ՀՀ վարչապետ լինելուց բավականին հեռվացել է։
«Այնպես որ, տեղին չէ նրա ասածների շուրջ լուրջ վերլուծություններ անելը, հատկապես, որ գիտենք՝ Ալիևը ամեն ինչ անելու է, որ Արցախում բնակվելը հայի համար անհնար դառնա ու լքի հայրենիքը, որի արդյունքում տեղի կունենա իր բաղձալի ցեղասպանությունը։ Կարծում եմ՝ Լաչինի միջանցքը միակողմանի բացելու մտադրություն ունի Ալիևը, սակայն այդ թեզերը Փաշինյանի միջոցով է մտցնում հայ հասարակության մեջ, որպեսզի այդ ձևով հայերին պատրաստի սպասվող օրակարգին»,-շեշտեց Հակոբյանը։
Հարցին՝ ինչպես խուսափել այդ օրակարգից, Հակոբյանը պատասխանեց․
«Փաշինյանն այլևս ոչ հայանպաստ գործողության դեմ ոչինչ անել չի կարող և միակ ելքը նրան վարչապետի աթոռից հեռացնելն է, որ Հայաստանն ու Արցախը փրկվեն։ Կա մեկ պրոբլեմ և այդ պրոբլեմի անունը Նիկոլ Փաշինյան է։ Արցախի ժողովուրդն իր հողում է մնալու և որևէ Նիկոլ Փաշինյան կամ այլ անուն-ազգանուն չի կարող մեզ պոկել մեր արմատներից։ ԼՂ հիմնահարցը դեռ լուծված չէ ու կապ չունի, թե ինչ են ասում Ալիևն ու Փաշինյանը»,- հավելեց մեր զրուցակիցը։
Լիաննա Թորոսյան
