Վարդան Պետրոսյանն ազատ է արձակվել

Դերասան Վարդան Պետրոսյանն օրերս ազատ է արձակվել: Էրեբունի և Նուբարաշեն վարչական շրջանների ընդհանուր իրավասության դատարանը քննել է նրա պայմանական վաղաժամկետ ազատելու հարցը եւ որոշել բավարարել այն։

Վարդան Պետրոսյանը լիովին ազատ է արձակվել, ինչը նշանակում է, որ նա հանգիստ կարող է մեկնել երկրից:

NEWS.am-ի հետ զրույցում նրա փաստաբան Նիկոլայ Բաղդասարյանը նշեց, որ տեղեկությունները, թե Վարդան Պետրոսյանը նախագահի ներումով է ազատ արձակվել, իրականությանը չեն համապատասխանում:

«Վարդան Պետրոսյանը Հանրապետության նախագահին ներման խնդրանքով չի դիմել, այդ լուրերն իրականությանը չեն համապատասխանում: Նա անցել է օրենքով սահմանված բոլոր ատյանները, այսինքն`  սկզբում կալանավայրի վարչակազմի կողմից դրական որոշում է կայացվել, որից հետո այսպես կոչված «անկախ հանձնաժողովն» է դրական եզրակացություն տվել, այնուհետեւ դատարանն արդեն բավարարել է քրեակատարողական հիմնարկի միջնորդությունը, ընդ որում դատախազությունը ևս չի առարկել: Սա մի բարդ գործընթաց է, որ շատ քիչ դատապարտյալներ կարող են անցնել»,- ասաց փաստաբանը:

Հիշեցնենք, որ երկու մարդու մահվան պատճառ դարձած ավտովթարի համար մեղավոր ճանաչված դերասան Վարդան Պետրոսյանը 2015թ. սեպտեմբերի 2–ից պատիժը կրում է բաց ռեժիմով, ինչը ենթադրում է, որ առավոտյան ժամը 8-ից դուրս է գալիս ՔԿՀ–ից եւ մինչեւ 20:00–ն պետք է կրկին ներսում լինի: Այդ ընթացքում դերասանը երկրի ներսում ազատ տեղաշարժման իրավունք ունի, իսկ հանգստյան օրերին պետք է լինի կալանավայրում:

Ավելի վաղ հայտնել էինք, որ 2013թ. հոկտեմբերի 20-ին Եղվարդ-Երեւան մայրուղու 32-րդ կմ-ում երկու ավտոմեքենա իրար էին բախվել: Պատահարի հետեւանքով 7 մարդ մարմնական վնասվածքներով տեղափոխվել էր հիվանդանոց, այդ թվում՝ դերասան Վարդան Պետրոսյանը: Ավելի ուշ 16–ամյա Էդգար եւ Էդուարդ Հակոբյան եղբայրները մահացել էին: Վարդան Պետրոսյանը դատապարտվել էր 5 տարվա ազատազրկման, որից երեք տարին պատիժը կկրի բաց ռեժիմով: