ՆԳ նախարարն ԱՄԷ դեսպանի հետ քննարկվել է համագործակցության խորացման վերաբերյալ հարցեր

Օգոստոսի 18-ին ՀՀ ներքին գործերի նախարար Վահե Ղազարյանն ընդունել է Հայաստանում Արաբական Միացյալ Էմիրությունների արտակարգ եւ լիազոր դեսպան Նարիման Ալ Մուլլային։ Այս մասին NEWS.am-ը տեղեկանում է ՆԳՆ ոստիկանությունից։

Նախարարը ողջունելով դեսպանին՝ շնորհավորել է նշանակման կապակցությամբ։ Վահե Ղազարյանը բարձր է գնահատել ՀՀ ներքին գործերի նախարարության եւ ԱՄԷ դեսպանության միջեւ ձեւավորված սերտ համագործակցությունը: Նա նաեւ ներկայացրել է նախարարության կազմավորման եւ ենթակա ծառայություններում իրականացվող բարեփոխումների մասին։ 

ՆԳ նախարարը համոզմունք է հայտնել, որ երկկողմ փոխգործակցությունն ավելի կզարգանա, եւ վերահաստատել է այդ ուղղությամբ հայկական կողմի պատրաստակամությունը։ 

Շնորհակալություն հայտնելով ջերմ ընդունելության համար՝ Նարիման Ալ Մուլլան մատնանշել է երկու երկրների բարեկամական հարաբերություններն ու պատրաստակամություն է հայտնել համագործակցել մի շարք ուղղություններով։ 

Այս համատեքստում Ներքին գործերի նախարարի տեղակալ Արփինե Սարգսյանը խոսել է Ջրային պարեկային ծառայության ստեղծման մասին։ Հայտնելով, որ ծառայությունը կսկսի գործել ամիսներ անց՝ փոխնախարարը ներկայացրել է այդ ուղղությամբ իրականացվող աշխատանքները՝ հատկապես առանձնացնելով ծառայողների վերապատրաստման եւ նյութատեխնիկական բազայի ձեւավորման գործընթացները։ ՆԳ նախարարի տեղակալն առաջարկել է ոլորտի վերաբերյալ համագործակցության հնարավոր ուղղություններ։ 

Հանդիպմանը քննարկվել են նաեւ ծառայություններում նոր տեխնոլոգիաների ներդրման հնարավորությունները, ինչպես նաեւ Փրկարար ծառայության ոլորտում փոխգործակցության վերաբերյալ հարցեր։