Շվեդիայի իշխանությունները հայտնել են, որ ահաբեկչական սպառնալիքի մակարդակը բարձրացել է
ՔԱՂԱՔԱԿԱՆՈՒԹՅՈՒՆ
Շվեդիայի իշխանությունները հաստատում են, որ երկրում ահաբեկչական վտանգի մակարդակը բարձրացել է, սակայն արտոնել են Իրաքից ներգաղթյալների նոր ակցիան Ստոկհոլմի կենտրոնում, որի ժամանակ նրանք կրկին հրկիզել են Ղուրանի էջերը։
Շվեդիայի մայրաքաղաք Ստոկհոլմում հերթական ակցիան է տեղի ունեցել՝ Ղուրանի այրմամբ։ Այն կազմակերպել են Իրաքից երկու միգրանտներ։ Սակայն նրանց գործողություններն աջակցություն չեն գտել մոտակայքում պատահաբար հայտնված անցորդների շրջանում։ Դժգոհներից մեկին, ով փորձել է խափանել ակցիան, ոստիկանությունը բերման է ենթարկել, հայտնում է Euronews-ը։
Մուսուլմանների համար սուրբ գրքի ցուցադրական պղծմամբ ցույցերը բուռն բողոքի ալիք են բարձրացնում իսլամական երկրներում։
Ոստիկանությունը և Շվեդիայի կառավարությունը հայտարարել են, որ երկրում անվտանգության իրավիճակը վատթարացել է, քանի որ ահաբեկչական խմբավորումների անդամները հարձակումների կոչեր են անում:
Մեծ Բրիտանիայի և ԱՄՆ-ի իշխանությունները իրենց այն քաղաքացիներին, ովքեր ցանկանում են այցելել այս սկանդինավյան երկիր, նախազգուշացնում են ահաբեկչական հարձակումների աճի սպառնալիքի մասին:
Շվեդիայի արդարադատության նախարար Գունար Ստրյոմերը հայտարարել է, որ ոստիկանությունը խստացնում է սահմանային հսկողությունը և ավելի ուշադիր կստուգի նրանց, ովքեր մտնում են Շվեդիայի տարածք։
«Շվեդիան, որպես արևմտյան երկրներից մեկը, ահաբեկչական հարձակումների «լեգիտիմ» թիրախից դարձել է առաջնահերթ։ Ամառվա ընթացքում և՛ անվտանգության ոստիկանությունը, և՛ կառավարությունը զեկուցեցին, որ մենք այժմ գտնվում ենք անվտանգության ավելի լուրջ իրավիճակում, քան վեց ամիս առաջ», - նշել է Ստրոմերը:
Շվեդ պաշտոնյաները բազմիցս դատապարտել են Ղուրանը պղծողների գործողությունները՝ միաժամանակ նշելով, որ երկրի ժողովուրդն ունի «սահմանադրորեն պաշտպանված հավաքների և արտահայտվելու ազատության իրավունք»։
Միաժամանակ Շվեդիայի իշխանություններն այժմ քննարկում են օրենսդրության մեջ փոփոխություններ մտցնելու հնարավորությունը, ինչը կկանխի ցուցարարների նման գործողությունները։
