ՔՊ-ին փող է պետք, շատ փող. oլիգարխներին պարտադրում են մուծվել
ՎԵՐԼՈՒԾՈՒԹՅՈՒՆՆԵՐ
«Քաղաքացիական պայմանագիր» կուսակցությունն իր վերջին դրամահավաքում կարողացել է հավաքել 1 միլիոն 300 հազար դոլարից քիչ ավելի գումար, ընդ որում լրատվամիջոցները տեղեկություններ են հայտնել, թե ովքեր են հիմնական ամենամեծ գումարները փոխանցել «Քաղաքացիական պայմանագրին»։
Մասնավորապես այդ թվում նշում են Արցախից եկած և Հայաստանում իր բիզնեսը զարգացնող Արման Հակոբջանյանը, իշխանությունների սրտի գործարար Նարեկ Նալբանդյանը, որ հայտնի է իր աղմկահարույց գնումներով, ինչպես նաև այլ տարբեր գործակալներ։
Մեր աղբյուրների փոխանցմամբ՝ ոչ միայն այս, այլ նաև այլ գործարարների հրահանգվել է պաշտոնապես տվածից բացի նաև նույնքան գումար էլ վճարել «Քաղաքացիական պայմանագրին», սակայն «քեշ» գումարով, առանց որևէ փաստաթղթավորման։
«Քաղպայմանագրում» հրաշալի հասկանում են, որ Երևանի ավագանու առաջիկա ընտրություններն անկախ ամեն ինչից նաև ռեսուրսների և ֆինանսների ճակատամարտ է դառնալու, ուստի և տարբեր գործարարների հրահանգել են բոլոր միջոցները ներդնել, ընդ որում նույնիսկ այն գործարարներին և ՔՊ-ի հետ կապ ունեցող անձանց, որոնք առանձնապես շահգրգռված չեն Տիգրան Ավինյանի ընտրությամբ։ Փաշինյանն անձամբ է հետևելու բոլոր գումարների հավաքագրմանը և իր, կամ իր մտերիմների կողմից հասկացրել է այդ գործարարներին, որ պետք է կրկնապատկեն պաշտոնապես տված գումարները։
Առաջիկայում «Քաղաքացիական պայմանագիրը» բազմաթիվ շտաբեր է բացելու Երևանի տարբեր համայնքներում և բնականաբար լուրջ գումարի կարիք է ունենալու։ Ժամանակին ֆինանսական խնդիրներ ունեցող և նման դրամահավաքներով չնչին գումարներ հավաքող Քաղպայմանագիրն այսօր լիովին քրեաօլիգարխիկ կուսակցություն է դարձել և որևէ խնդիր չունի կրկնօրինակել նախկինների արատավոր բարքերը՝ ինքն էլ գումարներ շորթել տարբեր օլիգարխներից և քրեական շրջանակներից։
Քնարիկ Մարգարյան
