Հայաստանի, Վրաստանի և Ղրղզստանի բանկերը դադարեցնում են համագործակցությունը Unistream-ի հետ. ինչպե՞ս գումար փոխանցել Ռուսաստանից
ՎԵՐԼՈՒԾՈՒԹՅՈՒՆՆԵՐ
Bfm.ru-ն գրում է, որ Unistream ընկերությունն ԱՄՆ-ի պատժամիջոցների տակ է հայտնվել հուլիսի 20-ին։ Նույն ցուցակում են եղել Tinkoff, Solidarity, Loko և Sant Petersburg Social Commercial բանկերը: Առաջինը Unistream-ի հետ աշխատանքը դադարեցրել են վրացական բանկերը, ապա միացել են ԱՊՀ այլ երկրների բանկերը։
Սկսենք նրանից, որ Unistream ծառայությունն ինքն անմիջապես հայտարարել է, որ մշակել է լուծում, որը թույլ կտա անխափան փոխգործակցություն գործընկերների հետ սովորական ռեժիմով։ Իսկ թե դա ի՞նչ լուծում է և ինչպե՞ս կաշխատի, ընկերությունում չեն ասել, ինչը տրամաբանական է։ Հենց ասեն, այդ սողանցքն էլ կփակեն։ Հարցն այն է,թե արդյո՞ք դա իսկապես աշխատում է: Ինչպես պատմել է Վրաստան տեղափոխված Վլադիսլավը, ինքը և իր ընկերները, ովքեր շարունակում են գումարներ ստանալ Ռուսաստանից, փնտրում են տրանսֆերային նոր տարբերակներ:
«Unistream-ը փողերի փոխանցման ամենապահանջված համակարգերից էր, քանի որ ընկերությունը շարունակում էր աշխատել Ռուսաստանի պատժամիջոցների տակ գտնվող բանկերի հետ: Իմ միջավայրում գրեթե բոլոր նրանք, ովքեր աշխատավարձ են ստանում Ռուսաստանի Դաշնությունից՝ օգտվել են այդ ծառայությունից։ Մյուս տարբերակներից մնացել են «Золотая корона»-ն և մի շարք այլ փոխանցումային համակարգեր, օրինակ «Контакт»-ը։ Առաջինը չեն աշխատում սանկցիաների տակ գտնվող բանկերի հետ, երկրորդը կարծես թե աշխատում է։ Այլ տարբերություններ չկան։ Ես ինքս դեռ չեմ փորձել, օգտվել եմ Unistream-ից, բայց ընկերներս արդեն սկսել են անցնել «Контакт»-ի», ասել է նա։
Հարցն այն է, թե այդ համակարգերը որքա՞ն ժամանակ կաշխատեն: bfm.ru-ի հետ զրուցած փորձագետների կարծիքով Unistream-ը պատժամիջոցների ցուցակում հայտնվելու օբյեկտիվ պատճառներ չուներ։ Դա պետական ընկերություն չէ և այլն։ Միակ չափանիշը, որի պատճառով համակարգը կարող էր պատժվել այն է, որ ընկերությունը տեսանելի է։ Եվ եթե շարժվենք այդ տրամաբանությամբ, ապա ոչ «Золотая корона»-ն, և ոչ էլ «Контакт»-ը 100 տոկոսով ապահովագրված չեն իրենց նկատմամբ կիրառվող նմանատիպ միջոցներից։
Էլ ի՞նչ է մնացել։ Այդ մասին հարցրել ենք «Бизнес Дром»-ի վերլուծական գործակալության գլխավոր տնօրեն Պավել Սամիևին:
««Мир» քարտից մինչև «Мир» քարտ համակարգն է աշխատում։ Նախ, մի շարք երկրներում «Мир» քարտը վավեր է, համապատասխանաբար, դուք կարող եք դրանով աշխատել, կամ կարող եք «Мир»-ից փոխանցել «Мир»-ին, և հետո փոխանցել նույն բանկի ներսում, եթե «Мир» քարտը թողարկված է այն երկրներից մեկում, որտեղ կա «Мир» և այլ համակարգեր: Դուք կարող եք դա անել Բելառուսի, Հայաստանի, Ղրղզստանի, Ղազախստանի հետ։ Ուզբեկստանի հետ մի փոքր ավելի բարդ է, քանի որ «Мир» քարտերն այնտեղ դադարել են գործել: Իմ կարծիքով, հենց այդ կերպ են կատարվում փոխանցումները»,- ասել է փորձագետը:
Կան նաև կրիպտոարժույթներ և սահմանափակումները շրջանցելու այլ եղանակներ: Bfm.ru-ի զրուցակիցների տրամադրությունը, ովքեր պարբերաբար Ռուսաստանից արտասահման գումար են փոխանցում իրենց կամ իրենց սիրելիներին, կարելի է բնութագրել այսպես. սողանցքներ միշտ էլ կան, բայց այդ ամենն ավելի թանկ է դառնում ու բարդանում։
Նյութը հրապարակման պատրաստեց Կամո Խաչիկյանը
