Դավիթ Հարությունյանն անարդար կերպով է հեռացվել դատական համակարգից. դատավոր Բալայան
ՔԱՂԱՔԱԿԱՆՈՒԹՅՈՒՆԻմ կարծիքով՝ դատական դեպարտամենտը կանխորոշել է այն դատավորների շրջանակը, ովքեր իրավունք ունեն առաջադրվելու, ես գտնում եմ, որ այդպես չի կարելի անել: Այս մասին այսօր՝ հուլիսի 19-ին, Դատավորների ընդհանուր ժողովից առաջ լրագրողների հետ զրույցում ասաց Երեւանի ընդհանուր իրավասության դատարանի դատավոր Դավիթ Բալայանը:
Հարցին՝ ինքն ի՞նչ է պատրաստվում անել այդ առնչությամբ, դատավորը պատասխանեց, որ ժողովի ընթացքում գուցե հայտարարությամբ հանդես գա.
«Այս ժողովին ԲԴԽ-ն չի մասնակցում: Մասնակցում են դատավորները: Կփորձեմ դատավորներին տեղ հասցնել այն, ինչ հիմքով դատարան եմ դիմել»,- ասաց Դավիթ Բալայանը:
Հարցին՝ արդյո՞ք ինքը որեւէ թեկնածուի օգտին քվեարկելու է, Բալայանն ասաց. «Ես չէի ցանկանա ժողովից առաջ իմ դիրքորոշումն արտահայտել»:
Անդրադառնալով դատավոր Դավիթ Հարությունյանի լիազորությունները դադարեցնելու ԲԴԽ-ի որոշմանը՝ դատավորն արձագանքեց. «Դավիթ Հարությունյանն անարդար կերպով է հեռացվել դատական համակարգից»:
Նշենք, որ Դավիթ Բալայանն ընդդեմ Դատական դեպարտամենտի ղեկավարի հայց է ներկայացրել դատարան: Նա պահանջում է ՀՀ դատական դեպարտամենտի ղեկավարի՝ Բարձրագույն դատական խորհրդի անդամի ընտրության համար քվեաթերթիկում ներառելու ծանուցումը միայն մարզերի առաջին ատյանի ընդհանուր իրավասության դատարանների դատավորներին ուղարկելու գործողությունը ոչ իրավաչափ ճանաչել եւ որպես հետեւանք՝ Բարձրագույն դատական խորհրդի անդամի ընտրության համար քվեաթերթիկում ներառելու ծանուցում ուղարկել առաջին ատյանի դատարանների բոլոր այն դատավորներին, ովքեր բավարարում են Բարձրագույն դատական խորհրդի դատավոր անդամի թեկնածուի համար սահմանված պահանջներին։ Վարչական դատարանը վարույթ է ընդունել Բալայանի ներկայացրած հայցն՝ ընդդեմ Դատական դեպարտամենտի ղեկավարի, սակայն մերժել է հայցի ապահովման միջոց կիրառելու մասին միջնորդությունը։
