Արցախում ստեղծված իրավիճակի միակ պատասխանատուն Հայաստանի իշխանությունն է. Մանե Թանդիլյան

Արցախում ստեղծված իրավիճակի, Հայաստանի անվտանգության խնդիրների միակ պատասխանատուն Հայաստանի իշխանությունն է։ Այդ մասին ֆեյսբուքյան իր էջում նշել է «Ապրելու երկիր» կուսակցության համանախագահ, Երևանի ավագանու ընտրություններում կուսակցության թեկնածու՝ Մանե Թանդիլյանը։

Նրա խոսքով՝ այնպես, ինչպես ցանկացած երկրի խնդիրների համար պատասխանատու է երկրի իշխանությունը, ցանկացած ներքին, արտաքին մարտահրավեր պետք է դիմակայվի իշխանությունների կողմից։ «Հերիք է ամեն ինչում՝ անտարբերության, լռելու, չպայքարելու մեջ մեղադրել ժողովրդին»,- փաստում է Մանե Թանդիլյանը։

«Ի՞նչ պետք է անի ժողովուրդը, որ չի անում։ Թերևս աշխարհի ամենաքաղաքականացված, ամենապայքարող ժողովուրդներից մեկն ենք, բայց պետական գործառույթները պատկանում են իշխանությանը։ Հայաստանը պետություն է՝ պետական ինստիտուտներով, պետական պաշտոնյաներով, ովքեր պարտավոր են լուծել երկրի բոլոր խնդիրները։ Ժողովուրդն ունի մեկ անելիք՝ ընտրել իշխանություն և օրենքի շրջանակներում ծառայել հայրենիքին»,- նշել է «Ապրելու երկիր» կուսակցության համանախագահը։

Նրա խոսքով՝ «Հիմա մենք ունենք մեկ խնդիր՝ ժողովրդի կողմից իրականացնել իշխանափոխություն ընտրությունների միջոցով։ Մնացած ամեն ինչով ժողովրդին զբաղեցնելն երկարացնում է այս իշխանության կյանքը՝ բերելով նորանոր խնդիրներ»։

Թերևս «Ապրելու երկիր» կուսակցությունն առաջինն է, որ արձանագրում է լրջագույն այս դիլեման, փաստում, որ չի կարելի բոլոր խնդիրները բարդել ժողովրդի վրա, ընդհակառակը փաշինյանական իշխանությունը հենց ինքն էլ ձգտում է այսպիսի նարատիվների տարածմանն՝ այդ կերպ իր վրայից նետելով իրական պատասխանատվությունը և այն բարդելով իրեն՝ պատահաբար կամ միամտորեն իշխանության բերած ժողովրդին։

Ըստ էության, ի տարբերություն ընդդիմադիր այլ քաղաքական ուժերի, որոնք սովոր են ժողովրդին պիտակավորել և մեղադրել Փաշինյանին իշխանության բերելու մեջ, «Ապրելու երկիր» կուսակցությունն արձանագրում է, որ դեմ առ դեմ խոսում է ժողովրդի հետ, բացատրում խնդիրները և առկա մարտահրավերները լուծելու հնարավորությունները։

Արփինե Բեգլարյան