Ռուսներն ավելի շատ ցանկանում են հանգստանալ Հայաստանում, քան Թուրքիայում կամ Եգիպտոսում
ՎԵՐԼՈՒԾՈՒԹՅՈՒՆՆԵՐ
Ayda.ru-ն գրում է, որ պաշտոնական աղբյուրների համաձայն ռուս զբոսաշրջիկներն իրենց հանգստի համար նախընտրում են Հայաստանն՝ ընտրելով այն որպես առաջնահերթ ուղղություն նույնիսկ Թուրքիայի և Եգիպտոսի համեմատությամբ։ Այս մասին հայտարարել է Զբոսաշրջության դաշնային գործակալության ղեկավար Ալեքսանդր Ռադկովը հավելելով, որ ամենայն հավանականությամբ դա պայմանավորված է նրանով, որ ռուսներն ակտիվ հետաքրքրություն են ցուցաբերում մշակութային ու կրթական զբոսաշրջության նկատմամբ։
«Ռուսաստանի ցուրտ կլիմայի պատճառով արևն ու ծովը միշտ պահանջված կլինեն, բայց մարդիկ չեն ցանկանում անընդհատ նույն վայրերը մեկնել։ Այժմ ռուսներն ավելի են հետաքրքրվում մշակութային արժեքներով, և Հայաստանը, դրա շնորհիվ, մեծ պահանջարկ ունի Ռուսաստանից ժամանած զբոսաշրջիկների շրջանում: Հայաստանն այդ առումով շատ հետաքրքիր է, քանի որ ունի բավականին մեծ թվով հուշարձաններ, պատմական տեսարժան վայրեր, լեռնադահուկային հանգստավայրեր և մշակութային այլ ուղղություններ»,- ասել է Ռադկովը։ Նա ընդգծել է, որ պետք է լինի ինչ-որ «հայկական բրենդ», որը կգրավի ռուսներին, և խոստացել է լոբբինգ անել Ռուսաստանում Հայաստանի շահերի համար.
Հայաստանում որպես ավանդական հանգստի վայրեր՝ մեծ ժողովրդականություն են վայելում «Արզնի», «Ծաղկաձոր» և «Հանքավան» հանգստավայրերը։
«Արզնի» հանգստավայրը գտնվում է Երևանից 25 կմ հյուսիս՝ Հրազդան գետի գեղատեսիլ կիրճում, 1250 մ բարձրության վրա: «Արզնին» հայտնի է իր հանքային ջրով, որի բուժիչ ուժը հայտնի է եղել հնագույն ժամանակներից։ «Արզնի» հանքային ջուրն օգտագործվում է սիրտ-անոթային հիվանդությունների, լյարդի և աղեստամոքսային տրակտի հիվանդությունների բուժման համար։
«Ծաղկաձորը» Հայաստանի հնագույն առողջարաններից է։ Այն գտնվում է ծովի մակարդակից 1845 մ բարձրության վրա և շրջապատված է անտառներով ու հիասքանչ մարգագետիններով: Ոչ առանց պատճառի «Ծաղկաձոր»-ը նշանակում է «Ծաղիկների հովիտ»։ Այնտեղ կլիման մեղմ է, օդը լցված է խոտաբույսերի բույրերով, իսկ ձմռան մեծ մասն արևոտ օրեր են։ Ծաղկաձորում երբեք սաստիկ ցրտահարություններ չեն լինում, չնայած այն հանգամանքին, որ այնտեղ դահուկային սեզոնը սկսվում է նոյեմբերի կեսերից և տևում մինչև մարտի վերջը։ Առողջարանը գործում է ինչպես ամռանն, այնպես էլ ձմռանը։
«Հանքավանը» գտնվում է «Ծաղկաձորի» մոտ՝ ծովի մակարդակից 1900 մ բարձրության վրա՝ Մարմարիկ գետի հովտում։ Բնությունն այնտեղ հիասքանչ է՝ սարեր ծածկված խիտ անտառներով։ «Հանքավանում» կան նաև բազմաթիվ հանքային աղբյուրներ, ինչպես նաև վայրեր, որտեղ կարելի է լողալ տաք հանքային ջրերում, ինչը շատ հաճելի պրոցեդուրա է հատկապես երեկոյան ժամերին։ Այստեղ ամառը շոգ է, սակայն երեկոյան բավականին զով է, ինչը լեռնային կլիմայի առանձնահատկություններից է։ «Հանքավանում» կան մի քանի պանսիոնատներ, հանգստյան տներ։
Նյութը հրապարակման պատրաստեց Կամո Խաչիկյանը
