Մեզ համար գլխավորը «կոկա կոլա» խմե՞լն է, թե՞ մեր ինքնորոշման իրավունքը. Արցախի նախագահ
ՎԻԴԵՈ
Մեզ վրա միայն մեկ ճնշում կարող է լինել, դա ժողովրդի կողմից ճնշումն է, այլ ճնշում չկա ու չի էլ կարող լինել, ոչ գերտերությունների, ոչ Հայաստանի իշխանությունների, ոչ քաղաքական ուժերի ու անձերի կողմից: Այս մասին հունիսի 29-ին Արցախի Հանրապետության ԱԺ-ում հայտարարեց Արցախի նախագահ Արայիկ Հարությունյանը:
«Ես հարգում եմ բոլորի կարծիքները, այն կարծիքները, որ ասում են՝ գնանք Բաքու հանդիպման, մարդիկ կան ասում են՝ այլ ձեւաչափով հանդիպման գնանք, մարդիկ կան, որ ասում են՝ պետք է հանդիպենք, որ ունենանք երկխոսություն, , մարդիկ կան ասում են՝ ընդհանրապես չպետք է հանդիպենք:
Մենք պետք է աշխատենք, որ հասարակությունը գոնե հասկանա, որ եթե 10 օր հետո շաքարավազ չլինի, շուկայի աշխատող կանայք չգան ասեն՝ բա վերջը ի՞նչ է լինելու: Մենք պետք է մեզ համար որոշում կայացնենք, մեզ համար գլխավոր նպատակը շաքարավազ ունենալն է, «կոկա կոլա» խմելն է, գարեջուր ունենա՞լն է, թե՞ մեր նպատակին հասնելը: Եթե մեր նպատակին հասնելն է, ապա պիտի կրենք զրկանքներ ու դա պետք է հասկանանք»,-ասաց նա:
Արայիկ Հարությունյանը հայտարարեց, որ ձմռանը գազ չի լինելու, Ադրբեջանն ամեն ինչ անելու է, որ հասարակությունը պառակտի, որ շուկայում աշխատող կանայք գան ասեն՝ բա վերջը ի՞նչ է լինելու: «Վերջը լավ է լինելու, համոզված եղեք: Այդ լավ լինելը պայմանավորված է լինելու մեզնից: Մեր ինքնորոշման իրավունքն իրացնելը կախված է լինելու մեզանից: 1988-ին շարժումը սկսել ենք, գլխներիս տվել է Սովետական Միությունը: Դրանից հետո դիմադրել ենք, կրել ենք զրկանքներ, շաքար չենք ունեցել, ուտելիք չենք ունեցել, ձեթ չենք ունեցել: Իրավիճակը նպաստավոր է եղել, պատերազմական գործողությունների արդյունքում կարողացել ենք հաջողություն արձանագրել եւ եկել է մի փուլ, երբ Ղարաբաղի հետ ոչ միայն հաշվի էին նստում, այլ քննարկում էին: Ասում էին՝ 5 շրջանը տվեք, երկուսը մնա ձեզ: Այսօր հաշվի չեն նստում, որովհետեւ մենք պատրաստ չենք, զրկանքները կրելը համարում ենք կործանարար: Մոենք զրկանքներ կրելով պետք է մեր ինքնորոշման իրվունքը հասցնենք իր վերջնական նպատակներին: Մեր ինքնորոշման իրավունքը ոչ մեկը, ոչ մի քաղաքական ուժ կամ անձ, ոչ մի միջազգային կառույց չի կարող կասկածի տակ դնել: Մեր ինքնորոշման իրավունքն է մեզ այստեղ պահում, եթե չլիներ մեր ինքնորոշման իրավունք իրացման հնարավորությունը, ես մեկ օր չեմ մնա իմ պաշտոնում: Ոչ ոք չի կարող մեզ զրկել ինքնորոշման իրավունքի միջազգային նորմից»,-հայտարարեց Արցախի նախագահը:
