Վահան Կոստանյանը բացահայտել է, թե որ հարցերի շուրջ պաշտոնական Երեւանն ու Բաքուն համաձայնության չեն հասել

Alphanews.am-ը գրում է.

Վաշինգտոնում ամերիկյան կողմի նախաձեռնությամբ երեք օր տեւած բանակցություններից հետո Հայաստանի եւ Ադրբեջանի արտգործնախարարությունները հայտարարել են, որ Երեւանն ու Բաքուն համաձայնության են հասել «Խաղաղության համաձայնագրի» նախագծի եւս մի քանի հոդվածների շուրջ եւ գրանցել փոխըմբռնման առաջընթաց՝ միեւնույն ժամանակ, արձանագրելով, որ մի քանի առանցքային հարցերի շուրջ դիրքորոշումները պահանջում են հետագա աշխատանք:

Հայաստանի արտաքին գործերի նախարար Արարատ Միրզոյանի հետ ԱՄՆ մեկնած փոխարտգործնախարար Վահան Կոստանյանը MediaHub-ի հետ զրույցում նշել է, թե որոնք են այն հիմնական հարցերը, որոնց շուրջ պաշտոնական Երեւանն ու Բաքուն պետք է շարունակեն քննարկումները։

«ԱՄՆ-ում տեղի ունեցած եռօրյա հանդիպման ժամանակ կողմերը չեն եկել համաձայնության այն հարցերի շուրջ, որոնք առնչվում են հայ-ադրբեջանական սահմանագծի հստակեցման, զորքերի հետքաշման, Լեռնային Ղարաբաղի ժողովրդի անվտանգության եւ իրավունքների երաշխիքների համար երկխոսության միջազգային մեխանիզմի ստեղծմանը։ Այս պահին նշված հարցերի շուրջ դիրքորոշումները տարբեր են»,- ասել է Կոստանյանը։

Հիշեցնենք, որ ԱՄՆ պետքարտուղար Էնթոնի Բլինքենը՝ ամփոփելով արտգործնախարարների հանդիպումը, երեկ հայտարարել էր Հայաստանի եւ Ադրբեջանի միջեւ բանակցություններում առաջընթաց գրանցելու մասին՝ նշելով, որ վերջնական համաձայնության հասնելու համար դեռ շատ աշխատանք կա կատարելու։

«Ես իմ երախտագիտությունն եմ հայտնում Հայաստանի եւ Ադրբեջանի միջեւ կայուն խաղաղության համաձայնագրի ձեռքբերման կարեւոր եւ բարդ աշխատանքի համար, ինչպես նաեւ մի շարք այլ կարեւոր խնդիրների լուծման համար, որոնք կարող են նպաստել երկրների միջեւ հարաբերությունների զարգացմանը», — ասել էր Էնթոնի Բլինքենը։

Վահան Կոստանյանը հստակեցրել է՝ «Խաղաղության պայմանագիրը» կստորագրվի այն ժամանակ, երբ բոլոր կետերի շուրջ պաշտոնական Երեւանն ու Բաքուն կգան համաձայնության։ Իսկ, թե ե՞րբ տեղի կունենա Հայաստանի եւ Ադրբեջանի արտաքին գործերի նախարարների հաջորդ հանդիպումը, ԱԳՆ խոսնակն ասել է՝ դեռ հստակ ժամկետներ չկան։