1 կգ ծիրանն Արցախում վաճառվում է 4500 դրամ, խակ խնձորը՝ 2500 դրամ․ ԱՀ ԱԺ պատգամավոր

Արցախում ոչ ձայն կա, ոչ շարժ՝ օդում կախված լարվածություն է, տխրություն, Արցախը լուռ է․ MediaHub-ի հետ զրույցում ասում է  ԱՀ Ազգային ժողովի պատգամավոր Մետաքսե Հակոբյանը։ 

Արմո Աբգարյան, Սամվել Թորոսյան, Երվանդ Թադեւոսյան, Գագիկ Բալայան․ զոհված զինծառայողների անուններն են, որոնց մահվան մասին բոթը այսօր  հայտնեց Արցախի Պաշտպանության բանակը։ Տղերքը զոհվել են Մարտունու եւ Մարտակերտի դիրքերում՝ Ադրբեջանի զինուժի հրետանու կրակից։ 

«Արցախը փոքր է, բոլորս իրար գիտենք, 4 տղերքի զոհվելու հանգամանքը մեզ համար շատ ծանր է»,-նշում է Հակոբյանը։

Թե ինչ են մտածում ու ինչ քայլեր են ուզում անել Արցախի իշխանությունները, ասում է՝ չգիտի, ժողովուրդն է իր գլխի ճարը տեսնում․ «Ես անընդատ փորձում եմ բնակիչների հետ խոսել, հասկանալ՝ ինչ իրավիճակ է։ Մարդիկ լարված են, անհանգիստ»։

199 օր ադրբեջանական իշխանությունների կողմից լիակատար շրջափակման մեջ հայտնված Արցախը տեւական ժամանակ անգամ սննդամթերք չէր կարողանում ստանալ։  Մետաքսե Հակոբյանի խոսքով՝ երբ ընտանիքում երեխա կա, չի կարող ծնողի սրտում խուճապ չլինել, մարդկանց մեջ խուճապային տրամադրություն կա, բայց որեւէ մեկը դա ցույց չի տալիս: Շեշտում է՝ արդեն 2-3 օր է Արցախի խանութներում առաջին անհրաժեշտության ապրանքներ չկան, մրգի ու բանջարեղենի մասին այլեւս չեն էլ խոսում։

«Այն քիչ բանջարեղենն ու մրգեղենը, որը կարող է գյուղացին բերել քաղաք՝ դարձել է անհնարին։ Շուկայում էլ, եթե հայտնվում է միրգ, կամ բանջարեղեն՝ վաճառվում է աստղաբաշխական գներով։ Օրինակ մեկ կիլոգրամ չհասած, խակ խնձորը վաճառվում էր 2500 դրամ, ծիրանը՝ 4500»,-ասաց նա։

Արցախի նախագահ Արայիկ Հարությունյանի հետ վերջին հանդիպման ժամանակ Հակոբյանը հարցրել է՝ ի՞նչպես մարդիկ կարողանան կազմակերպվել, գիտակցել այն ինչ կատարվում է իրենց շուրջը։

«Այդ հարցերի պատասխանները չունի Արայիկ Հարությունյանը։ Մտահոգված տեսք կարող է ընդունել յուրաքանչյուրը, բայց եթե այդ մտահոգությունը իրական է, դրան պետք է հաջորդեն գործողությունները։ Մենք մտահոգված ղեկավարի գործողություններ այդպես էլ 3 տարվա մեջ չտեսանք։ Տեսանք անօգնական մեկին, որն իր գործառույթները չի իրականացնում։ Ժողովուրդը փորձում է ինքնակազմակերպվել ու իր խնդիրները ինքնուրույն լուծել»,-նշեց նա։

Լիա Սարգսյան