Երբ «նախկինը» խոսում է «նախկինների» վատ բարքերից. Վիգեն Խաչատրյանի մետամորֆոզները

«Նախկիններ-ներկաներ» արատավոր դիսկուրսը դարձել է փաշինյանական վարչախմբի և նրա սպասարկուների ամենագլխավոր թեզը ընդդիմախոսների դեմ պայքարում, ընդ որում տարօրինակ զուգադիպությամբ նախկիններին թալանի և տարատեսակ հանցագործությունների մեջ ամենաբարձրը մեղադրում են փաշինյանական իշխանության այն ներկայացուցիչները, որոնք հենց նախկինների օրոք բարգավաճել են, եղել նրանց սպասարկուները։

«Քաղաքացիական պայմանագիր» խմբակցության ամենատխրահռչակ պատգամավորներից մեկը՝ Վիգեն Խաչատրյանը, իրեն ոչ պակաս լավ էր զգում նաև նույն նախկինների օրոք, այդ թվում՝ Ռոբերտ Քոչարյանի և Սերժ Սարգսյանի։ Խաչատրյանն, որ այսօր պարբերաբար ելույթներ է ունենում, խրոխտ ձայնով խոսում նախկինների, նրանց հանցավորության մասին, պատմում, թե հազիվ ենք պրծել Սերժ Սարգսյանից և նրա իշխանությունից, սրտաճմլիկ տեքստեր երկնում, թե որքան է զզվում նախկիններից, նույն այդ նախկինների օրոք աշխատում էր Սերժ Սարգսյանի մտերիմ ընկեր Միխայիլ Բաղդասարովի մոտ, իսկ Բաղդասարովի «Միկա» ընկերությունը, նույնիսկ այդ ժամանակ մամուլի տարբեր միջոցներով բազմիցս գրվել է, թե անմիջական կապ ունի հենց Սերժ Սարգսյանի հետ։

Վիգեն Խաչատրյանը նախ Միխայիլ Բաղդասարովի խորհրդականն էր, ապա և նրան պատկանող համանուն «Միկա» ֆուտբոլային ակումբի նախագահը, և տարիներ շարունակ նրան չէր խանգարում այդ նախկինների գործոնը, աշխատում և բավական բարձր աշխատավարձ էր ստանում։ Շատ ավելի նախկինների օրոք ևս Խաչատրյանը գրեթե նույն կերպ է վարվել, իր քաղաքական կարիերայի ողջ ընթացքում քննադատել է նախկիններին և գովել ներկաներին, ինչը և անում է այսօրվա ներկաների՝ Փաշինյանի և նրա վարչախմբի օրոք։

Վստահաբար հաջորդ իշխանության պարագայում Խաչատրյանը ևս փորձելու է քննադատել նույն Փաշինյանին և քծնել եկողներին։ Թերևս կարելի է արձանագրել, որ որևէ նոր իշխանության Վիգեն Խաչատրյանի որակի անձինք հարկավոր չեն լինի։ Իսկ, թե որքան քաղաքական ուժ է փոխել Վիգեն Խաչատրյանն իր քաղաքական կարիերայի ընթացքում, ում հետ ինչ ստվերային պայմանավորվածությունների մեջ է եղել, ում է «քցել» և ում է խաբել, թերևս պատմելու չի, մեր հանրությունը հրաշալի գիտի։ 

Աննա Սարգսյան