Էրդողանն ու Ալիևը անցել են բացահայտ սպառնալիքների
ՎԵՐԼՈՒԾՈՒԹՅՈՒՆՆԵՐ
Թուրքիայի նախագահ Ռեջեփ Թայիփ Էրդողանը իր առաջին օտարերկրյա այցելությունն է կատարել դեպի Ադրբեջան և երեկ պաշտոնական հանդիպում ունեցել Իլհամ Ալիևի հետ։ Ինչպես և սպասելի էր այդ հանդիպումից հետո Թուրքիայի և Ադրբեջանի նախագահները մի շարք հայտարարություններ են արել, սպառնալիքներ տեղացել Հայաստանի և Արցախի հասցեին։
Թուրքիայի նախագահը հայտարարել է, թե Անկարան պատրաստ է Բաքվի ուզած պահին գլխավոր հյուպատոսություն բացել Շուշիում։ «Թուրքիայի գլխավոր հյուպատոսության բացումն անխոս ուղերձ կլինի ողջ աշխարհին՝ հատկապես Հայաստանին»,- հայտարարել է Էրդողանը։
Ադրբեջանի նախագահն իր հերթին նշել է, թե այսպես կոչված Զանգեզուրի միջանցքի բացումն անխուսափելի է։ Ըստ նրա՝ այդ հարցը քննարկել են Էրդողանի հետ և որքան շուտ բացվի միջանցքը, այնքան լավ։ «Մենք կավելացնենք մեր ջանքերն այս հարցում»,- ասել է Ալիևը և հավելել, որ միջազգային իրավունքը չի գործում, այսօր աշխարհում առաջին պլան է մղվում ուժի գործոնը։
Ըստ էության, սա ոչ այլ ինչ է, քան ուղիղ սպառնալիք Հայաստանի և Արցախի հասցեին։ Հատկապես հիմա, երբ կրկին սրվել է միջանցքի հարցը, Հայաստանի իշխանություններն էլ անընդհատ «կռուտիտներ են լինում» ՝ հայտարարելով, թե Հայաստանը հրաժարվում է միջանցքային տրամաբանությունից, իսկ երկաթուղին և մնացած հաղորդակցության ուղիները գործարկվում են Հայաստանի իրավազորության տակ, Ադրբեջանի և Թուրքիայի այս սպառնալիքներն առանձնապես աչք են ծակում, նույնիսկ Հայաստանի արտգործնախարարությունը ստիպված է եղել հայտարարություն տարածել՝ նշելով, որ Ադրբեջանը գնում է էսկալացիայի։
ԱԳՆ-ն, իհարկե, մեղադրանքի սլաքներն ուղղել է ռուսների ուղղությամբ՝ խաղաղապահներին կոչ անելով կատարել իրենց պարտականությունները։ Այն, որ Ադրբեջանն ու Թուրքիան պատրաստվում են ռազմական ինտերվենցիայի և Սյունիքը Հայաստանից կտրելուն, 44- օրյա պատերազմից հետո գրեթե որևէ մեկի մոտ կասկած չի հարուցում, թերևս բացառությամբ փաշինյանական վարչախմբի, որն իր խաղաղության դարաշրջանի տապալված օրակարգով շարունակում է խաբել և շեղել հանրությանը։ Աստված ոչ անի, եթե պատերազմ եղավ, այս անգամ հետևանքները Հայաստանի համար շատ ավելի ծանր են լինելու։
Թամարա Հակոբջանյան
