Ինչո՞ւ ընդդիմությունը չի մասնակցի Նիկոլ Փաշինյանի հարցաքննությանը․ մեկնաբանում է Սեյրան Օհանյանը
ՔԱՂԱՔԱԿԱՆՈՒԹՅՈՒՆ
Խորհրդրանական ընդդիմությունը չի մասնակցի վարչապետ Նիկոլ Փաշինյանի հարցաքննությանը 44-օրյա պատերազմի հանգամանքները քննող հանձնաժողովում։ Այս մասին NEWS.am-ի հետ զրույցում ասաց «Հայաստան» խմբակցության ղեկավար Սեյրան Օհանյանը։
«Նիկոլ Փաշինյանի խոսքը ոչնչով չի տարբերվելու նախկին հարցազրույցներից, հայտարարություններից, մանիպուլյացիաներից։ Չենք մասնակցելու նաեւ, որովհետեւ քննիչ հանձնաժողովում մեծ մասը ՔՊ-ականներն են, քվեարկելու են այնպես, ինչպես ուզելու են։ Եվ հանձնաժողովում էլ կան փորձագետներ, որոնք իրենք պետք է պատասխան տան՝ ինչով են զբաղվել պատերազմի ժամանակ»,- նշեց Օհանյանը։
Օհանյանը հիշեցրեց, որ այդ պատճառով էր ընդդիմությունը հանդես եկել օրենսդրական նախաձեռնությամբ, որով առաջարկվում էր ստեղծել քննիչ հանձնաժողով, որը դուրս կլիներ ԱԺ-ից, կլիներ համաչափ բախշմամբ, առանց պաշտոնյաների։
«Այս հանձնաժողովն արդյոք գնահատակա՞ն է տալու նախորդ գումարման Պաշտպանության եւ անվտանգության հանձնաժողովին։ Անդրանիկ Քոչարյանն ինքն իրեն գնահատակա՞ն է տալու։ Իրենք պետք է գնատական տան գործադիր իշխանությանը, քաղաքական, ռազմաքաղաքական բոլոր խնդիրներին, կարողացե՞լ են պետությունը դնել ռազմական ռելսերի վրա, համախմբե՞լ են ողջ ժողովրդին, իրականանացրե՞լ են մոբիլիզացիա, գնահատե՞լ գլխավոր հարվածի ուղղությունը, համալրե՞լ են բանակը։ Սրանք իրենք չեն իրականացրել են»,- ընդգծեց նա։
Սեյրան Օհանյանի խոսքով՝ քննիչ հանձնաժողովը պետք է գնահատական տա նաեւ դատական իշխանությանը։ Դատաիրավական համակարգը կարողացե՞լ է օրինականություն մարտական գործողություններում եւ պետության խորքում, թե՝ ոչ։
«Արդյոք իրենք քննչական գործողություննե՞ր են կատարել, արդյոք պարեկային խստացումնե՞ր են իրականացնրել, որ մարտական գործողությունների ամբողջ հատվածում օպերատիվ խորությամբ կարգուկանոն լինի։ Կարողացե՞լ են կանգնեցնել փախուստները։ Իսկ այս բոլոր ապօրինությունները խրախուսվել են ոչ միայն պատերազմի ժամանակ, այլեւ դրանից հետո։ Տեսեք՝ ովքեր են ստացել գեներալական կամ դրանց հավասարեցված դասական աստիճաններ․ ամբողջությամբ դատաիրավական համակարգը, որովհետեւ իշխանությունը զավթել է այն եւ օգտագործում է իր նպատակների համար»,- եզրափակեց Սեյրան Օհանյանը։
