Նիկոլ Փաշինյանն անկեղծորեն պատմում է իր դավաճանության մասին. Զարմանալու պատճառ չկա

Հայաստանի վարչապետի պաշտոնը զբաղեցնող Նիկոլ Փաշինյանը ըստ էության ամենաանկեղծ քաղաքական գործիչն է Հայաստանում։ Նա անկեղծորեն հայտարարում է, որ ճանաչում է Ադրբեջանի տարածքային ամբողջականությունը, պատրաստ է ճանաչել Լեռնային Ղարաբաղը որպես Ադրբեջանի մաս, ավելին, նույնիսկ Ադրբեջանին փոխանցել այսպես կոչված անկլավները՝ 7 կամ 8 գյուղեր Հայաստանի տարածքում, որոնք Ադրբեջանը համարում է իրենը։ Ընդ որում Փաշինյանը առաջին անգամը չէ, այլ 44-օրյա պատերազմում կրած պարտությունից հետո բազմիցս բարձրաձայնել է իր մտադրություների մասին։

Նախքան պատերազմը «Արցախը Հայաստան է և վերջ» հայտարարող Փաշինյանը երեկ գրեթե բառացի հայտարարել է՝«Արցախը Ադրբեջան է և վերջ», ընդ որում տարօրինակն այն է, որ Փաշինյանի այս հայտարարությունները ամեն անգամ ցնցումներ են առաջացնում հայ հասարակության հոգու խորքում։ Փաշինյանն ըստ էության ապացուցել է, որ այլևս դուրս է Հայաստանի քաղաքական համակարգից և նրան պետք է վերաբերվել որպես թուրք-ադրբեջանական տանդեմի կառավարիչ, իսկ նրա հայտարարություններից ցնցումների մեջ հայտնվել բնականաբար չարժե։

Երեկ իր ասուլիսում Նիկոլ Փաշինյանը հաստատեց՝ ճանաչում է Ադրբեջանի 86600 քառ.կմ, ընդ որում այդ տարածքը ներառում է նաև Լեռնային Ղարաբաղը։ -Տեսեք 86600 քառ.կմ նաև ներառում է Լեռնային Ղարաբաղը,-ասել է նա։

Հարցին, թե ուղիղ չի նշում, թե Հայաստանի կառավարությունն ասում է, որ Արցախն ադրբեջանի մի մաս է, Նիկոլ Փաշինյանը պատասխանել է. «Հայաստանի այսօրվա կառավարությունն ինչ ասի չասի, բոլոր կառավարությունները ճանաչել են Ադրբեջանի տարածքային ամբողջականությունը, ես ասել եմ ու ավելի եմ կոնկրետացրել և ավելի կոնկրետ դժվար եմ պատկերացնում՝ ինչպես կարող եմ ասել 86600 քառ.կմ տարածքային ամբողջականությունը Հայաստանի Հանրապետությունը պատրաստ է ճանաչել»։

Ընդ որում նա հաջորդ հարցերից մեկում կրկին պնդել է, որ այդ Ադրբեջանի տարածքային ամբողջականության մեջ մտնում են նաև անկլավները։ Փաշինյանն այս դեպքում փորձել է խուսանավել Արծվաշենի հարցում, իբր քննարկումների դեպքում հնարավոր է Ադրբեջանին մնա Արծվաշենը, իսկ անկլավները վերադարձվեն Ադրբեջանին։ Նրա այս սենսացիոն հայտարարությունը ապշեցրել է նույնիսկ ադրբեջանցիներին։ Իլհամ Ալիևի հետ սերտ հարաբերություններ ունեցող Հաքին Ազը իր հոդվածը վերնագրել է «Նիկոլ Փաշինյանի սենսացիոն հայտարարությունը»։

Այս իրավիճակում ամենատարօրինակը ընդդիմության վարքն է, որը երեկ այդ սենսացիոն և սկանդալային հայտարաություններից հետո այդպես էլ որևէ հայտարարություն չարեց, իսկ ողջամիտ և կոշտ արձագանքը հնչեց միայն Արցախից։

Մհեր Ղուկասյան