Ծանրամարտի առաջնությունը լուրջ փորձություն է դարձել փաշինյանական իշխանության համար
ՎԵՐԼՈՒԾՈՒԹՅՈՒՆՆԵՐ
Ծանրամարտի Եվրոպայի առաջնությունը բավականին լուրջ փորձություն է դարձել փաշինյանական իշխանության համար։ Նախօրեի տեղի ունեցած միջադեպը, երբ դիզայներ Արամ Նիկոլյանը պարզապես այրել էր Ադրբեջանի դրոշը, իսկ դրանից հետո, Ադրբեջանի իշխանությունները պատրվակ գտնելով և առաջնությունից հեռացնելով իրենց մարզիկներին, կարողացել էին Հայաստանի Հանրապետությանը հերթական անգամ դնել ծանր իրավիճակի մեջ, փաշինյանական իշխանությունը որոշել է բոլոր իր քննադատությունների թիրախը փոխանցել թե՛ դրոշն այրող դիզայների և թե՛ պարզապես շարքային քաղաքացիների ուղղությամբ՝ նրանց մեղադրելով ստեղծված իրավիճակում։
Հայաստանի վարչապետի աշխատակազմի ղեկավար, Ծանրամարտի առաջնության կազմակերպումը ղեկավարող Արայիկ Հարությունյանը հայտարարել է, թե ամեն դետալ քննարկել էին, հաշվի են առել քաղաքական, մարզական և բարոյահոգեբանական բոլոր նրբությունները՝«Ու ամեն դեպքում, գուցե ամենավերջին դետալը հաշվի չէինք առել, չէինք հաշվարկել, որ տեղի ունեցավ այս միջադեպը, պետությանը, այո՛ հենց պետությանը պետք է վերաբերվել խնամքով։ Ամեն մի չմտացված իբր թե «հերոսական քայլ» կարող է հետ գցել, նահանջ արձանագրել առաջընթացի ճանապարհին»,- հայտարարել է Արայիկ հաությունյանը։
Վերջինս, իհարկե, փորձում է իր վրայից հեռացնել պատասխանատվության ամբողջ բեռը, սակայն խնդիրն այն է, որ հենց նույն դիզայներ Արամ Նիկոլյանը՝ որպես առաջնության գլխավոր դիզայներ, ով անգամ իր սեփական «Նիկոլյան» դիզայներական ստուդիայում է կարել Ադրբեջանի դրոշը բարձրացնող աղջկա հագուստը, առաջնությանը մասնակցել է Արայիկ Հարությունյանի պատվերով, ուստի և հարկավոր է փաստել, որ մեղադրանքի սլաքներն այլոց վրա ուղղելուց առաջ, վարչապետի աշխատակազմի ղեկավարը հենց ինքը պետք է գիտակցի՝ առաջին և թերևս ամենամեծ մեղավորը հենց ինքն է, որ չի կարողացել հաշվարկել տարրական հասարակ բաները։
Նիկոլյանը, որը գրեթե 19 միլիոն դրամ է ստացել առաջնության ամբողջ դիզայնը կազմակերպելու համար, սեփական ստուդիայում ադրբեջանական դրոշ և դրոշակակիր աղջկա հագուստ է կարել Ադրբեջանի դրոշի գույներով, ապա և այրել Ադրբեջանի դրոշը, որևէ խնդիր չունի, մի կողմից պետական գումարներ ստանալու, մյուս կողմից էլ «հերոսանալու» համար, իսկ հանրությունը իր պրկված նյարդերի և պատերազմից հետո ստեղծված իրավիճակի համար բնականաբար որևէ կերպ մեղավոր չէ։
Ստեղծված իրավիճակի միակ պատասխանատուն հենց Արայիկ Հարությունյանն է՝ իր անմիջական ղեկավար Նիկոլ Փաշինյանի գլխավորությամբ։
Լուսինե Մանուկյան
