Մանե Թանդիլյանը չափազանց լավ է պատկերացնում Երևանի խնդիրները

Կապիտալ ծախսերի թերակատարումը ավանդական է նաև Երևանի բյուջեի համար և դարձել է ամենաստաբիլ և կանխատեսելի չկատարողականը, որով էլ բացատրվում է Երևանի 2022թ․ի բյուջեում կապիտալ ծախսերի թերակատարումը։ «Ապրելու երկիր» կուսակցության նախագահ Մանե Թանդիլյանն է այս արձանագրումն արել։

Նրա խոսքով, այդ թերակատարումներից առանձնապես աչքի են ընկնում այնպիսի ծախսերը, որոնց ցուցադրական բացումը չես անի, ասել է թե՝ բանտիկներ չես կտրտի։ «Օրինակ, նախագծային աշխատանքները թերակատարվել են 23%-ով, ոռոգման ցանցի կառուցումն ու վերանորոգումը՝ 35%-ով, փողոցների և այլ կահավորում՝ 46%-ով, իսկ զբոսաշրջության զարգացման չկատարողականը թերակատարվել է ռեկորդային 86%-ով։ Դե, ո՞ւմ են պետք զբոսաշրջիկները, միևնույնն է, ընտրողներ չեն ․․․»,- նշել է Թանդիլյանը։

Նրա խոսքով, հատկանշական է, որ շուտով կլրանա Ծիծեռնակաբերդի խճուղու փլուզման մեկ տարին։ Քաղաքային իշխանությունը խոստանում էր այն վերականգնել 2 ամսում։ «Հետաքրքիր է, թե սա չկատարողականի որ հոդվածի տակ են տեղավորել, որովհետև մինչ այսօր խճուղին փլուզված է, խոստումը՝ չկատարված, երևանցիների հավատը՝ սպառված»,- նշել է նա։

Երևանի քաղաքապետարանի աշխատանքի մասին այս բավական կոշտ եւ փաստարկված քննադատությունը վկայում է՝ Մանե Թանդիլյանը չափազանց լավ է պատկերացնում Երևանի խնդիրները, ավելին, քան այլ ընդդիմադիրներ, անգամ այժմ Երեւանը «կառավարող» իշխող խմբակի ներկայացուցիչները։

Մանե Թանդիլյանը, ըստ ամենայնի, գլխավորելու է «Ապրելու երկրի. ընտրական ցուցակը Երևանի ավագանու ընտրություններում։ Հենց նրա անձով, կուսակցությամբ եւ խնդիրներին խորքային մոտենալու, քաջատեղյակ լինելու պատճառով է, որ «Ապրելու երկրից» սարսռում են գործող վարչախմբի ներկայացուցիչները՝ հրաշալի հասկանալով, թե ով կարող է իրական մրցակից լինել առաջիկա ընտրություններում։ 

Սոնա Գուլքանյան