Հերթական ապտակը Նիկոլ Փաշինյանին՝ Արևմուտքից

Մինչ Հայաստանի գործող վարչախումբը շարունակում է ժողովրդավարության բաստիոնի մասին հեքիաթներով կերակրել սեփական հանրությանն ու միջազգային գործընկերներին, արևմտյան հերթական հեղինակավոր կազմակերպությունը հետազոտություն է հրապարակել, որտեղ ցույց է տալիս Հայաստանի գործող իշխանությունների կատարյալ ձախողումը գրեթե բոլոր ոլորտներում։

Բրիտանական «Legatum Prosperity Index» հետազոտության մեջ տարբեր երկրների ցուցանիշները հաշվարկվել են 12 հիմնական ուղղություններով։

2022 թվականի զեկույցի համեմատ Հայաստանի դիրքերը վատթարացել են, 59-րդ հորիզոնականից Հայաստանը տեղափոխվել է 61-րդ հորիզոնական, աշխարհի 167 երկրների մակարդակով։ Զեկույցը փաստում է, որ Հայաստանում վատացել է իրավիճակն անձնական ազատությունների և կառավարման ոլորտում, խայտառակ վատ է գնահատվել քաղաքական հաշվետվողականության ցուցանիշը, ինստիտուցիոնալ վստահությունը կառավարման մարմինների նկատմամբ, կառավարության արդյունավետությունը։

Զեկույցը նաև արձանագրել է առանձին ոլորտներում Հայաստանի տեղը։ Երկրում կտտանքների օգտագործման հարցում Հայաստանը 120-րդ տեղում է, քաղաքական բանտարկություններով՝ 78-րդ, կառավարությունից մամուլի ազատության հարցում՝ 109-րդը, գործող իշխանության զսպման ցուցանիշներում 102-րդ տեղում, իսկ ինստիտուցիոնալ վստահության մակարդակով՝ 129-րդ հորիզոնականում է։ Ցածր է նաև վստահությունը ոստիկանության, իրավապահ համակարգի և դատարանների նկատմամբ, իսկ քաղաքական տերորի մակարդակով Հայաստանն աշխարհում 91-րդ տեղում է։

Տվյալները, որոնք ներկայացրել է ՀՀԿ փոխնախագահ Արմեն Աշոտյանը, վկայում են, որ Նիկոլ Փաշինյանի օրոք Հայաստանը ոչ միայն բարեկեցության, ժողովրդավարության և ապահովության բաստիոն չէ, այլ նաև մի շարք՝ հատկապես կառավարության գործունեության և ազատություններին վերաբերող ցուցանիշներով զբաղեցնում է խայտառակ դիրքեր։ «Հայաստանում ոչ միայն անվտանգության, այլ նաև կառավարման և ազատությունների առումով Նիկոլ Փաշինյանի կառավարման տոտալ ֆիասկո է»,- արձանագրում է Աշոտյանը։

Կարինե Առուստամյան