Հետքա՞յլ, թե՞ «կռուտիտ». Հռոմի ստատուտը խառնել է Հայաստանի իշխանությունների հաշվարկները
ՎԵՐԼՈՒԾՈՒԹՅՈՒՆՆԵՐ
Հայաստանը լսել է Ռուսաստանի Դաշնությունից հնչող մտահոգությունները և կկարողանա այնպես անել, որ Հռոմի կանոնադրության հետ կապված հետագա ընթացքի ապահովումը չվնասի Հայաստան-Ռուսաստան ռազմավարական հարաբերություններին։
ՀՀ ԱԺ փոխնախագահ Հակոբ Արշակյանն այդ մասին ասել է «Արմենպրեսի» հետ հարցազրույցում։ Նրա խոսքով, հստակ արձանագրվել է, որ սա Հայաստանի արձագանքն է Հայաստանի ինքնիշխան տարածքների դեմ Ադրբեջանի ագրեսիայի դեպքերին, մասնավորապես սեպտեմբերյան ագրեսիայի ժամանակ Ադրբեջանի զինծառայողների կողմից գործած պատերազմական հանցագործություններին։
«Հռոմի կանոնադրության վավերացումը Հայաստանին հնարավորություն կտա միջազգային քրեական դատարանում դնել Ադրբեջանի զինծառայողների գործած ծանրագույն հանցագործությունների համար պատասխանատվության հարցը»,- ասել է նա՝ պատասխանելով հարցերին, թե ՀՀ ՍԴ որոշումը կլապված է Հռոմի կանոնադրության հետ։
Արձագանքն է արդյոք միջազգային քրեական դատարանի կողմից ՌԴ նախագահի նկատմամաբ կալանքի օրդերի արձակմանը։ Արշակյանը պնդել է, որ այդ որոշումը բացառապես իրավական է և պատասխանում է միայն մեկ հարցի. «Արդյոք Հռոմի կանոնադրությամբ նախատեսված պարտավորությունները համապատասխանում են Հայաստանի սահմանադրությանը»։
Հիշեցնենք՝ հայ-ռուսական հարաբերությունները կտրուկ վատթարացել էին Սահմանադրական դատարանի որոշումից հետո, Ռուսաստանը անձնական վիրավորանք է համարել այս որոշումը, իսկ ՌԴ նախագահ Վլադիմիր Պուտինը տևական ժամանակ արհամարհում է Նիկոլ Փաշինյանի հեռախոսազանգերն ու արդարանալու փորձերը։
Հակոբ Արշակյանի այս հարցազրույցից կարելի է եզրակացնել, թե Հայաստանը առնվազն հետքայլ է անում այդ առումով և փորձում Ռուսաստանին համոզել, որ այս որոշումն ամենևին էլ Վլադիմիր Պուտինի դեմ ուղղված չէ, մյուս կողմից, եթե գործող իշխանությունները հայտարարում են, թե Հռոմի կանոնադրության վավերացման հետագա ընթացքը կախված է միայն Ադրբեջանի ագրեսիայի դեմ և հնարավորություն կտա միջազգային քրեական դատարան դնել Ադրբեջանի զինծառայողների գործած ռազմական հանցագործությունների համար պատասխանատվության հարցը, ապա կարելի է վստահաբար պնդել, որ փաշինյանական իշխանությունը որոշում է կայացրել մինչև վերջ գնալ Հռոմի ստատուտը վավերացնելու ուղղությամբ։
Հակառակ պարագայում, եթե հանկարծ փաշինյանական իշխանությունները հետ քայլ կատարեն և հրաժարվեն Հռոմի ստատուտի վավերացումից, այդ դեպքում էլ նրանց հնարավոր կլինի մեղադրել Ադրբեջանի շահերն առաջ մղելու մեջ։ Ցանկացած պարագայում Հռոմի կանոնադրության շուրջ ստեղծված իրավիճակը լրջագույն վտանգներ է ներկայացնում թե՛ Հայաստանի Հանրապետության համար և թե՛ փաշինյանական իշխանության հետագա պաշտոնավարմանը։
Կարեն Հակոբյան
