Իրավական երկակի ստանդարտներ, որ հարցերի լուծումը տանում են փողոց

Բուռն քննարկման առիթ հանդիսացավ ԱԺ պետաիրավական հանձնաժողովի նիստում տեղի ունեցած հերթական միջադեպը, որը ևս հասավ բռունցքներով հարվածելուն: 2018թ-ից հետո ձևավորված ԱԺ-ում նման միջադեպերի պակաս չկա:

Էականն այն է, որ նման միջադեպերը կանխելու համար որևէ իրավական և ոչ իրավական գործողություն չի արվել: Նախ ՔՊ-ական Սասուն Խաչատրյանը, երբ հարվածեց Էդմոն Մարուքյանին, որևէ պատասխանատվություն չկրեց՝ ո՛չ քաղաքական և ո՛չ էլ իրավական:

Հետագայում, երբ ՔՊ պատգամավոր Վահագն Ալեքսանյանը, ոտքով հարվածեց «Հայաստան» դաշինքի պատգամավոր Վահե Հակոբյանին և  նման մի քանի այլ դեպքերով իրավական ընթացք չեղավ: Ընդդիմադիր պատգամավորները հարցը համարեցին լուծված, այսպես ասած, տղայական կռիվ ու վերջ:

Իսկ երեկ ՔՊ պատգամավերներն այնքան արագությամբ էին ոստիկանություն զանգել, որ Մհեր Սահակյանը չէր հասցրել հասնել «Հայաստան» դաշինքի միջանցք: ՔՊ-ն կրկին դիմեց էժանագին մեթոդների՝ լուրեր տարածեց, թե Մհեր Սահակյանը թաքնվել է կանանց զուգարանում և նման բաներ: Ժողովրդկան խոսքը մեկ անգամ չէ, որ ապացուցել է՝ մարդը դիմացինին մեղադրում է նրանում, ինչին ինքն է ընդունակ:

Ի դեպ, տեղեկությունը տարածողը Վահագն Ալեքսանյանի անվան հետ կապվող և ՔՊ վարչության գրասենյակում գործող լրատվականն էր: Ժամանակին այդ նույն տղայական պատասխանն էլ ընդդիմադիրները չտվեցին և այս իրավիճակը նաև նախորդ միջադեպերը հանդուրժելուց է բխել:

Իսկ ինչո՞ւ Մհեր Սահակյանը վազեց «Հայաստան» դաշինքի կողմը: Ռեակցիան բնական է, քանի որ երբ արդեն հարվածել էր, գոնե այդ պահին իրեն այդտեղ պետք է չհարվածեին, իսկ իրեց դաշինքի հատվածում ընդդիմադիր պատգամավորը շատ ընկերներ ունի: Տարօրինակ է նաև այն, որ բարոյական արժեքներից խոսում է մի քաղաքական ուժ, որ ամիսներ առաջ իրենց սենյակ էր հրավիրել ընդդիմադիր պատգամավորների օգնականներին՝ խոսելու նպատակով և տասնյակով հարվածել էին երկու հոգու: Այստեղ իրավական առումով կրկին երկակի ստանդարտներ գործեցին և որևէ մեկը պատասխան չտվեց: 

Մենք ապրում ենք մի երկրում, որտեղ ժողովրդավարության և դատական համակարգի բարեփոխումների մասին գոռում են իշխանության ներկայցուցիչները և հենց իրենք իրավական համակարգին ուղղված իրենց հրահանգներով խլացնում են այդ ձայնը: Ինչո՞ւ ձերբակալել Մհեր Սահակյանին, իսկ օրինակ՝ Վահագն Ալեքսանյանին, ոչ: Սա ևս մեկ ապացույցն է այն բանի, որ իրավական համակարգում կան երկակի ստանդարտներ:

Երբ իրավական հարթությունում հարցերը չեն կարգավորվում՝ լուծումը մնում է փողոցային օրենքներին, իսկ արդյուքը՝ իրավական պետություն չունենալն է:

Աննա Ավետիսյան