Օնիկ Գասպարյանի գերլոյալությունը Նիկոլ Փաշինյանին կոնկրետ գին ունի

Զինված ուժերի գլխավոր շտաբի նախկին պետ Օնիկ Գասպարյանին վերջին օրերին երկու անգամ հրավիրել են ԱԺ 44-օրյա պատերազմի հանգնամանքներն ուսումնասիրող քննիչ հանձնաժողով, որտեղ գեներալը 4-5 ժամ «երգել» է, ցուցմունքներ տվել տարբեր անձանց, իր ենթակաների, տեղակալների վրա։

Թերևս, դրանով է պայմանավորված, որ «Քաղաքացիական պայմանագրի» պատգամավորները, հատկապես ԱԺ պաշտպանության և անվտանգության հարցերի հանձաժողովի նաժագահ Անդրանիկ Քոչարյանը չափազանց ոգևորված են Օնիկ Գասպարյանի հարցաքննությունից, առիթն էլ բաց չեն թողնում նրան գովելու։

Մեր աղբյուրի փոխանցմամբ, Գասպարյանի ցուցմունքները հնարավորություն են տվել առաջ մղել գրեթե երկու տարի տեղում դոփող քննությունը։ «Վաստակաշատ» գեներալը, ըստ էության, «լիզել» է իր թքածը, հետ կանգնել նախկին հայտարարություններից՝ Նիկոլ Փաշինյանի պաշտոնանկության պահանջով, ուստի չի բացառվում, որ նրան առաջիկայում որևէ պաշտոնում տեսնենք։

Ըստ բանակում շրջանառվող տեղեկությունների, Գասպարյանին լուրջ պաշտոնի առաջարկ են արել, ինքը ընտրի՝ վերադառնա՞լ բանակ որևէ բարձր պաշտոնի, թե՞ գործունեություն ծավալել քաղաքացիական դաշտում։ Անգամ լուրեր են շրջանառվում Տավուշի մարզպետի պաշտոնում Գասպարյանի նշանակելու հնարավորության մասին։

Թեև, ավելի հակված են Օնիկ Գասպարյանին հայ-ռուսական միացյալ զորախմբի հրամանատարի պաշտոնում նշանակելուն։ Այդ պաշտոնն օրեր առաջ է թափուր մնացել գեներալ-մայոր Տիգրան Փարվանյանի ազատումից հետո։ Հատկապես, Օնիկ Գասպարյանը լուրջ կապեր ունի ռուսական զինվորականության հետ, և ռուսական կողմը դեմ չի լինի նրա նշանակմանը։ Իսկ Օնիկ գասպարյանի նախկին քաղաքական հայտարարությունների կապակցությամբ էլ «Քաղպայմանագրին» և նրա քարոզչական թևին հանձնարարվելու է ասել, թե ամեն դեպքում Նիկոլ Փաշինյանը հարգում է պրոֆեսիոնալներին, բոլորն էլ սխալական են, այդ թվում՝ Օնիկ Գասպարյանը։

Ճամարտակելու են, թե Օնիկ Գասպարյանին ԶՈՒ ԳՇ պետից հանել են ոչ թե անձեռնահասության, այլ քաղաքականության մեջ խառնվելու համար։ Ըստ էության, Օնիկ Գասպարյանի գերլոյալությունը Նիկոլ Փաշինյանին կոնկրետ գին ունի։ Սա է մեր սպայակույտը և նրա նախկին ղեկավարը, և պատերազմի հետևանքներն էլ այսքան ողբերգական են ստացվել։

Որովհետև՝ ոնց ապրում են, այնպես էլ կռվում են։

Սերինե Բադալյան