Փաշինյանական դեմարշ Լավրովի ասուլիսից հետո

Հայաստանի և Ռուսաստանի արտգործնախարարների՝ Մոսկվայում կայացած հանդիպումներից հաշված րոպեներ անց, Հայաստանի վարչապետի պաշտոնը զբաղեցնող Նիկոլ Փաշինյանը հեռախոսազրույց է ունեցել ԱՄՆ պետքարտուղար Էնթոնի Բլինքենի հետ, քննարկել են Ադրբեջանի կողմից Լաչինի միջանցքի ապօրինի շրջափակման հետևանքով ստեղծված հումանիտար ճգնաժամին վերաբերող հարցեր։

Վարչապետի աշխատակազմի փոխանցմամբ՝ Նիկոլ Փաշինյանն ու Էնթոնի Բլինքենը մտքեր են փոխանակել Հայաստան–Ադրբեջան հարաբերությունների կարգավորման, տարածաշրջանում հաղորդակցման ուղիների բացման հեռանկարների շուրջ։ Նիկոլ Փաշինյանը մտահոգություն է հայտնել վերջին շրջանում Ադրբեջանի կողմից աճող ագրեսիվ հռետորաբանության կապակցությամբ, իսկ ԱՄՆ պետքարտուղարը վերահաստատել է Լաչինի միջանցքն անհապաղ վերաբացելու մասին իր կոչը և ընդգծել, որ ԱՄՆ-ն պատրաստակամ է շարունակել աջակցությունը վերոնշյալ գործընթացներին։

Հեռախոսազրույցի մասին իր թվիթերյան էջում հայտնել է նաև Էնթոնի Բլինքենը՝ նշելով, որ Հարավային Կովկասում խաղաղության միակ ճանապարհը դիվանագիտությունն է։ Պաշտոնական այս հայտարարություններից և հաղորդագրություններից իհարկե պարզ չի դառնում Հայաստանի վարչապետի և ԱՄՆ պետքարտուղարի հեռախոսազրույցի իմաստը։

Այն, որ դա տեղի է ունենում Սերգեյ Լավրովի և Արարատ Միրզոյանի ասուլիսից հետո, որտեղ հայկական կողմը գրեթե ամբողջությամբ պաշտպանել է արևմտյան թեզերն ու տարբերակները, ըստ երևույթին պետքարտուղարը զանգահարել էր «շնորհակալություն» հայտնելու Նիկոլ Փաշինյանին՝ ստեղծված իրավիճակում Արևմուտքի կողմը բռնելու համար և իր աջակցությունը հայտնելու։ Գաղտնիք չէ, արդեն տևական ժամանակ փաշինյանական վարչախումբը փոխում է Հայաստանի արտաքին քաղաքական վեկտորը և այդ ուղղությամբ լրջագույն ջանքեր է գործադրում։

Ըստ էության, ՌԴ արտգործնախարարին չի հաջողվել ընդհանուր հայտարարի բերել Արարատ Միրզոյանին, ավելին, եթե այդ հանդիպումից առաջ խոսվում էր, թե քննարկելու են Հայաստանի, Ռուսաստանի և Ադրբեջանի արտգործնախարարների առաջիկա հանդիպումը, ասուլիսից պարզ է դառնում, որ նույնիսկ այդ հարցում հստակեցում չկա։

Ըստ էության, հայկական կողմը Ռուսաստանի նկատմամբ նոր դեմարշ է իրականացրել, որի հետևանքները պարզ կդառնան առաջիկայում։

Լուսինե Մանուկյան